Xalq deputatlari Olmazor tuman Kengashining qarori bilan shu kungacha Toshkent shahar Olmazor tuman hokimi sifatida faoliyat yuritgan Rahmonov Baxtiyor Sultonovich egallab turgan lavozimidan ozod etildi. Bu haqda Toshkent shahar hokimligi ma’lum qildi.
Uning o‘rniga Mullajonov Abdumajid Fayzullayevich hokim etib tayinlandi.
Ma’lumot uchun, Mullajonov 1970-yilda Sirdaryo viloyatida tug‘ilgan. 1996-yilda Toshkent davlat yuridik institutini tamomlagan.
U 2019-yildan shu kunga qadar Olmazor tumani bo‘yicha Ichki ishlar organlari faoliyatini muvofiqlashtirish boshqarmasi boshlig‘i vazifasida ishlab kelayotgan edi.
Baxtiyor Rahmonov esa Toshkent shahar hokimining arxitektura, kapital qurilish va kommunikatsiyalarni rivojlantirish masalalari bo‘yicha birinchi o‘rinbosari etib tayinlandi. Bu lavozimda ishlagan Davron Xidoyatov esa Toshkent viloyat hokimi vazifasini bajaruvchi etib tayinlandi.
Ma’lumot uchun, Baxtiyor Rahmonov 1959-yilda Toshkent viloyatida tug‘ilgan.
1981-yilda Kiyev muhandislik-qurilish institutini, 2000 yilda O‘zbekiston Respublikasi Prezidenti huzuridagi Davlat va jamiyat qurilishi akademiyasini tamomlagan.
Avvalroq Toshkent viloyati hokimining birinchi o‘rinbosari etib Ulug‘bek Uzoqov tayinlangani, Toshkent viloyati hokimi Rustam Xolmatov ishdan olingani haqida xabar berilgandi. Shuningdek, Jismoniy tarbiya va sport vaziri Dilmurod Nabiyev lavozimidan ozod etilgan edi.
Izoh (0)