Bektemir postida 36 yoshli Qirg‘iziston fuqarosining yonidan 8,34 gr ko‘knori boshog‘i topildi

26-yanvar kuni soat 10:30 larda Bektemir YPX maskanida IIO xodimlari tomonidan o‘zida shubha uyg‘otgan 36 yoshli Qirg‘iziston fuqarosi xolislar ishtirokida ko‘zgan kechirilganida, uning yonidan 8,34 gramm ko‘knori boshog‘i topilgan. Bu haqda Tergov departamenti xabar berdi.

Ma’lum qilinishicha, B.B. ismli qirg‘izistonlik erkak 38 yoshli D.Sh. boshqaruvida bo‘lgan kulrang Mercedes-Benz avtomobili Toshkent viloyatidan Toshkent shahriga qarab harakatlanib kelayotgan bo‘lgan. O‘zida shubha uyg‘otganligi sabab B.B. xolislar ishtirokida ko‘zdan kechirilganida, uning egnidagi qora rangli erkaklar kurtkasining old o‘ng cho‘ntagidan qog‘ozga o‘ralgan, yashil rangli, 9 dona o‘tkir hidli o‘simlik boshoqlari borligi aniqlanib, tegishli tartibda rasmiylashtirib olingan.

Toshkent shahar IIBB EKMning xulosasiga ko‘ra, B.B.dan olingan 9 dona o‘simlik boshoqlari tarkibida opiy guruhiga mansub bo‘lgan giyohvand alkaloidlar — morfin, kodein, tebain mavjud bo‘lib, ko‘knori boshog‘i deb atalishi, boshoqning og‘irligi 8,34 grammga tengligi aniqlangan.

Olib borilgan tergovga qadar tekshiruv jarayonida, ushbu giyohvand moddasi B.B. 25-yanvar kuni taxminan soat 07:00 larda Qozog‘iston hududidan O‘zbekiston hududiga “G‘ishtko‘prik” chegara posti orqali, bojxona nazoratini chetlab olib o‘tib yonida saqlab kelganligi aniqlangan.

Mazkur holat yuzasidan Bektemir tumani bo‘yicha IIO FMB Tergov bo‘linmasi tomonidan B. B.ga nisbatan Jinoyat kodeksning 276-moddasi 1-qismi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) hamda 246-moddasi 1-qismi (kontrabanda) bilan jinoyat ishi qo‘zg‘atilib, protsessual tartibda ushlangan. Hozirda tergov harakatlari olib borilmoqda.