Халқ депутатлари Олмазор туман Кенгашининг қарори билан шу кунгача Тошкент шаҳар Олмазор туман ҳокими сифатида фаолият юритган Раҳмонов Бахтиёр Султонович эгаллаб турган лавозимидан озод этилди. Бу ҳақда Тошкент шаҳар ҳокимлиги маълум қилди.
Унинг ўрнига Муллажонов Абдумажид Файзуллаевич ҳоким этиб тайинланди.
Маълумот учун, Муллажонов 1970 йилда Сирдарё вилоятида туғилган. 1996 йилда Тошкент давлат юридик институтини тамомлаган.
У 2019 йилдан шу кунга қадар Олмазор тумани бўйича Ички ишлар органлари фаолиятини мувофиқлаштириш бошқармаси бошлиғи вазифасида ишлаб келаётган эди.
Бахтиёр Раҳмонов эса Тошкент шаҳар ҳокимининг архитектура, капитал қурилиш ва коммуникацияларни ривожлантириш масалалари бўйича биринчи ўринбосари этиб тайинланди. Бу лавозимда ишлаган Даврон Хидоятов эса Тошкент вилоят ҳокими вазифасини бажарувчи этиб тайинланди.
Маълумот учун, Бахтиёр Раҳмонов 1959 йилда Тошкент вилоятида туғилган.
1981 йилда Киев муҳандислик-қурилиш институтини, 2000 йилда Ўзбекистон Республикаси Президенти ҳузуридаги Давлат ва жамият қурилиши академиясини тамомлаган.
Аввалроқ Тошкент вилояти ҳокимининг биринчи ўринбосари этиб Улуғбек Узоқов тайинлангани, Тошкент вилояти ҳокими Рустам Холматов ишдан олингани ҳақида хабар берилганди. Шунингдек, Жисмоний тарбия ва спорт вазири Дилмурод Набиев лавозимидан озод этилган эди.
Изоҳ (0)