Slovakiyada COVID-19’ni aniqlash uchun umummilliy test topshirishning uchinchi bosqichi yakunlandi, deb xabar bermoqda “Korrespondent.net” mamlakat Sog‘liqni saqlash vazirligiga tayanib.
Qayd etilishicha, 5,5 million aholisi bo‘lgan mamlakatning qariyb uch million fuqarosi tekshirildi. 18-yanvardan 26-yanvargacha 10 yoshdan oshgan 2,95 million slovaklar tezkor test topshirgan. Ularning 1,24 foizida test natijalari ijobiy chiqqan.
Bunday testlar natijani 15 daqiqadan keyin ko‘rsatishi, ularning taxminiy umumiy qiymati 57 million yevroni tashkil etishi oktabr oyida ma’lum qilingandi. Mamlakat bosh vaziri Igor Matovich “Bu Slovakiyada va o‘ylaymanki, boshqa hech bir davlatda bo‘lmagan operatsiya bo‘ladi”, deb aytgandi.
Slovakiyada ommaviy test sinovlarining uchinchi bosqichi rasman ixtiyoriy bo‘lgan. Ammo mamlakatdagi yangi qoidalarga ko‘ra, koronavirusning salbiy test natijasini yoki avval kasallanib chiqqani to‘g‘risida hujjat taqdim eta olmagan fuqarolar 7-fevralga qadar ishga borishi va sayr qilishga chiqishi taqiqlanadi.
Eslatib o’tamiz, dekabr oyida Slovakiya lokdaun joriy etilgan, ishga va tibbiyot muassasalariga borishdan tashqari uydan chiqish taqiqlangandi.
Yanvar oyining o‘rtalaridan esa Slovakiyada koronavirusni aniqlash uchun takroriy ommaviy test topshirish boshlandi.
Izoh (0)