Germaniya COVID-19 koronavirusiga qarshi vaksina yetishmasligi sababli qiyin davrga duch keladi, dedi mamlakat sog‘liqni saqlash vaziri Yens Shpan. Bu haqda “Interfaks” ma’lum qildi.
“Vaksina yetishmovchiligi sabab bizni kamida 10 ta og‘ir hafta kutmoqda”, – deya vazirning so‘zlarini keltirgan Yevropa ommaviy axborot vositalari.
Shpan emlash jarayonlarini muhokama qilish uchun Germaniyada federal va mintaqaviy hokimiyat ishtirokida sammit chaqirmoqchi ekanini qo‘shimcha qildi.
Yevrokomissiyaning sog‘liqni saqlash bo‘yicha a’zosi Stella Kiriakidis AstraZeneca kompaniyasiga COVID-19 vaksinasini yetkazib berish jarayoniga o‘zgartirish kiritgani uchun aniqlik kiritishni so‘rab xat yubordi. Ta’kidlanishicha, kompaniya Yevropa Ittifoqiga dastlab kelishilganidan ancha kam dozalarni yuborgan.
Uning so‘zlariga ko‘ra, ilgari Yevropa Ittifoqi ushbu kompaniya vaksinani yaratishi va uni ishlab chiqarishini moliyalashtirib, ularni tez yetkazib berish uchun oldindan buyurtmalar bergan. Endi rasmiy Bryussel “shartnomaning to‘liq bajarilishini” xohlamoqda.
Stellaning so‘zlariga ko‘ra, “kelgusida Yevropa Ittifoqida COVID-19 vaksinalarini ishlab chiqaradigan barcha kompaniyalar o‘z vaksinalarini eksport qilmoqchi bo‘lsa, bu to‘g‘risida oldindan xabar berishlari shart”.
Yevropa dori-darmon agentligi (EMA) ushbu haftaning oxiriga qadar AstraZeneca vaksinasini tasdiqlashi kerak edi.
Yevropa Ittifoqi, ilgari imzolangan kelishuvga muvofiq, 2021-yilning birinchi choragida 100 million dozada vaksina olishi kerak. Ammo Ittifoq ishlab chiqarish masalalari sababli buyurtmani yarmini oladi degan qo‘rquv bor.
Avvalroq Yevropa komissiyasi Yevropa Ittifoqiga va hamjamiyat mamlakatlari bo‘ylab safarlar bo‘yicha tavsiyalarni kuchaytirgani hamda Finlyandiya koronavirusning yangi shtammlari tufayli sayyohlarning mamlakatga tashrifini cheklab qo‘ygani haqida xabar berilgandi.
Izoh (0)