Hibsda saqlanayotgani xabar qilingan Qirg‘iziston sobiq bosh vaziri Muhammadkaliy Abilgaziyev sud qaroriga ko‘ra 2021-yil 26-martga qadar qamoqda ushlab turiladi. Bu haqda mamlakat Oliy sudining matbuot xizmati bergan ma’lumotga tayanib, “TASS” xabar tarqatdi.
“Bishkek shahridagi Pervomaysk tuman sudining 2021-yil 28-yanvardagi qaroriga ko‘ra gumonlanuvchi Abilgaziyev 26-martga qadar hibsda saqlanadi”, – degan Oliy sud vakili.
Qirg‘iziston hukumatining sobiq rahbari Abilgaziyev 2018–2020-yillar davomida Vazirlar mahkamasini boshqargan. U 26-yanvar kuni katta maydondagi yer uchastkalarini noqonuniy ravishda ajratib berish va qonunga xilof ravishda boylik orttirish jinoyatlarini amalga oshirganlikda gumon qilinmoqda.
Qirg‘iziston davlat Milliy xavfsizlik qo‘mitasining Korrupsiyaga qarshi kurash xizmati bergan ma’lumotlarga ko‘ra, sobiq bosh vazir “Kumotr gold kompani” nomli korxona nomiga Issiqko‘l viloyatidagi oltin koni joylashgan yerlarni geolograzvedka va oltin qazib olish uchun ajratib berish haqida qaror imzolagan. Oqibatda oltin koni joylashgan maydon ikki baravar kengayib, 26,3 ming gektarga yetgan.
Qo‘mitaning qayd etishicha, qaror imzolangan davrda oltin koni hududini kengaytirish va atrof-muhitning landshaft xilma-xilligi, tabiiy resurslar, “Qizil kitob”ga kiritilgan o‘simlik va hayvonot dunyosiga zarar yetkazishi haqidagi hukumat qarori o‘z kuchida bo‘lgan. Mazkur hududlardagi ishlarni yanada kengaytirilishi Issiqko‘l hududida iqlim o‘zgarishlariga olib kelishi va mamlakat ekologiyasiga salbiy ta’sir qilishi mumkin, deya hisoblaydi Qirg‘iziston davlat Milliy xavfsizlik qo‘mitasi.
Maxsus xizmat bergan ma’lumotlarga ko‘ra, Abilgaziyev hukumatga rahbarlik qilgan davrida uning norasmiy daromadlari sezilarli darajada oshgan. Sobiq bosh vazir faol tarzda ko‘chmas mulk xarid qilgan va ularni boshqa shaxslar nomiga rasmiylashtirgan.
Izoh (0)