Словакияда COVID-19’ни аниқлаш учун умуммиллий тест топширишнинг учинчи босқичи якунланди, деб хабар бермоқда «Korrespondent.net» мамлакат Соғлиқни сақлаш вазирлигига таяниб.
Қайд этилишича, 5,5 миллион аҳолиси бўлган мамлакатнинг қарийб уч миллион фуқароси текширилди. 18 январдан 26 январгача 10 ёшдан ошган 2,95 миллион словаклар тезкор тест топширган. Уларнинг 1,24 фоизида тест натижалари ижобий чиққан.
Бундай тестлар натижани 15 дақиқадан кейин кўрсатиши, уларнинг тахминий умумий қиймати 57 миллион еврони ташкил этиши октябрь ойида маълум қилинганди. Мамлакат бош вазири Игор Матович «Бу Словакияда ва ўйлайманки, бошқа ҳеч бир давлатда бўлмаган операция бўлади», деб айтганди.
Словакияда оммавий тест синовларининг учинчи босқичи расман ихтиёрий бўлган. Аммо мамлакатдаги янги қоидаларга кўра, коронавируснинг салбий тест натижасини ёки аввал касалланиб чиққани тўғрисида ҳужжат тақдим эта олмаган фуқаролар 7 февралга қадар ишга бориши ва сайр қилишга чиқиши тақиқланади.
Эслатиб ўтамиз, декабрь ойида Словакия локдаун жорий этилган, ишга ва тиббиёт муассасаларига боришдан ташқари уйдан чиқиш тақиқланганди.
Январь ойининг ўрталаридан эса Словакияда коронавирусни аниқлаш учун такрорий оммавий тест топшириш бошланди.
Изоҳ (0)