O‘zbekistonda abituriyentlar cheklanmagan miqdorda ta’lim yo‘nalishlarini tanlashi mumkin bo‘ladi

O‘zbekistonda 2021/2022-o‘quv yili qabulida abituriyent avvalgidek 5 tagacha emas, cheklanmagan miqdorda ta’lim yo‘nalishlarini tanlashi mumkin bo‘ladi. Bu haqda Davlat test markazi direktori Majid Karimovga tayanib O‘zA xabar berdi.

Majid Karimovning so‘zlariga ko‘ra, hozirda 2021/2022-o‘quv yili qabulidagi test sinovlariga taklif tayyorlash bosqichi bo‘lsa ham, o‘zgarishlar bo‘ladi. Xususan, abituriyentlar uchun cheklanmagan miqdorda ta’lim yo‘nalishlari bo‘yicha tanlovda ishtirok etish huquqi yaratiladi.

Bunda to‘plagan ballari bilan tanlov bosqichida abituriyent avvalgidek 5 tagacha emas, balki test sinovi topshirgan fanlar majmui mos keladigan cheklanmagan miqdorda ta’lim yo‘nalishlarini tanlashi mumkin bo‘ladi.

“Bunda, avvalo, ‘cheksiz tanlov’ iborasi xohlagan ta’lim yo‘nalishini tanlashni anglatmaydi va bunday o‘zgarishni joriy etish uchun test sinovi topshiriladigan fanlarga, ularning ketma-ketligidan qat’i nazar, bir xil ball berilishi talab etiladi. Kengroq tushuntirilganda, ‘cheksiz tanlov’ faqat test sinovi topshiriladigan fanlari bir xil bo‘lgan ta’lim yo‘nalishlari doirasida amal qiladi. Bu o‘zgarish ham abituriyentlarning o‘qishga kirish imkoniyatini keskin oshiradi, — deydi Majid Karimov.

Shuningdek, Davlat test markazi direktori test sinovi jarayonlarining shaffofligi, adolatliligini ta’minlashda inson omilini kamaytirish yo‘lida qator ishlar olib borilayotganini ma’lum qilgan. Qayd etilishicha, Davlat test markazi axborot xavfsizligi borasida tegishli idoralar bilan birgalikda ish olib boradi.

Avvalroq O‘zbekistonda kirish imtihonida eng yuqori ball to‘plagan 200 nafar talabaga Prezident granti berilishi ma’lum bo‘lgandi.