Toshkentda Mustaqillik ko‘chasiga olib chiquvchi besh yildan beri yopiq chorrahani ochish ishlari qog‘ozbozlik sabab to‘xtab qoldi

Toshkentning Mirzo Ulug‘bek tumanidagi Parkent ko‘chasidan Mustaqillik ko‘chasiga o‘tish yo‘li yana ochilayotgani to‘g‘risida xabar berilgandi. Obodonlashtirish xizmati xodimlari hatto hududni tozalash ishlarini ham amalga oshirgan, biroq shundan so‘ng yo‘lning ochilish ishlari to‘xtab qoldi.

“Podrobno.uz”ning poytaxt hokimligi matbuot xizmatiga tayanib yozishicha, yo‘lning ushbu qismini ochish uchun qator jarayonlarni amalga oshirish kerak. Ta’kidlanishicha, bu borada tegishli rasmiy so‘rov tayyorlanib, qator idoralarga yuborilishi lozim. Hujjat tasdiqlanishi uchun bir nechta idoradan, xususan, IIBB, YHXBB, Toshkent hokimligidan o‘tishi kerak bo‘ladi.

Rejalashtirilgan ishlar boshlanishi bilan to‘xtab qolgan. Biroq poytaxt hokimligining ma’lum qilishicha, yo‘lni ochish bo‘yicha ishlar davom etmoqda, batafsil ma’lumotlar to‘g‘risida keyinroq xabar qilinadi.

Uzoq yillar davomida yopiq bo‘lgan poytaxtdagi ayrim ko‘chalar Shavkat Mirziyoyev prezident etib saylanganidan keyin ochilishni boshladi. 2015-yilning avgustida Oqqo‘rg‘on ko‘chasidan Mustaqillik tomon eltuvchi Parkent hamda “Buyuk ipak yo‘li” metro bekati yo‘llari temir panjaralar bilan to‘liq yopilgandi. O‘shanda sobiq Pushkin skveridan qayrilib olish yopilgan va Parkent bozori tomon harakatlanish taqiqlangan edi.