Samarqandda YPX inspektoriga 600 ming so‘m pora berishga uringan fuqaro qo‘lga olindi. Bu haqda “Daryo” Samarqand viloyat IIB axborot xizmati ma’lum qildi.
Ta’kidlanishicha, Samarqand shahrining Mirzo Ulug‘bek va Buyuk ipak yo‘li ko‘chalari kesishgan chorrahada haydovchi X.B. boshqaruvidagi “VAZ-2103” yo‘l harakati qoidalarini buzib harakatlangani uchun to‘xtatilgan va tegishli tartibda haydovchiga nisbatan ma’muriy bayonnoma rasmiylashtirilgan. Avtomashina esa vaqtinchalik jarima maydonchasiga joylashtirilgan.
Shundan so‘ng haydovchi inspektorga avtomashinasini jarima maydonchasidan chiqarib berishi evaziga 600 ming so‘mni pora tariqasida taklif qilgan. YPX inspektori ushbu holat yuzasidan bildirgi orqali viloyat IIB boshlig‘i nomiga murojaat qilgan.
Mazkur bildirgiga asosan IIV O‘z xavfsizligi boshqarmasi hamda Samarqand shahar prokuraturasi xodimlari tomonidan o‘tkazilgan tezkor tadbirda fuqaro X.B. YPX inspektoriga 600 ming so‘mni pora tariqasida bergan vaqtda ashyoviy dalillar bilan ushlangan.
Holat yuzasidan Jinoyat kodeksining 211-moddasi 1-qismi (pora berish) bilan jinoyat ishi qo‘zg‘atilgan.
Izoh (0)