Ўзбекистонда 2021/2022-ўқув йили қабулида абитуриент аввалгидек 5 тагача эмас, чекланмаган миқдорда таълим йўналишларини танлаши мумкин бўлади. Бу ҳақда Давлат тест маркази директори Мажид Каримовга таяниб ЎзА хабар берди.
Мажид Каримовнинг сўзларига кўра, ҳозирда 2021/2022-ўқув йили қабулидаги тест синовларига таклиф тайёрлаш босқичи бўлса ҳам, ўзгаришлар бўлади. Хусусан, абитуриентлар учун чекланмаган миқдорда таълим йўналишлари бўйича танловда иштирок этиш ҳуқуқи яратилади.
Бунда тўплаган баллари билан танлов босқичида абитуриент аввалгидек 5 тагача эмас, балки тест синови топширган фанлар мажмуи мос келадиган чекланмаган миқдорда таълим йўналишларини танлаши мумкин бўлади.
«Бунда, аввало, ‘чексиз танлов’ ибораси хоҳлаган таълим йўналишини танлашни англатмайди ва бундай ўзгаришни жорий этиш учун тест синови топшириладиган фанларга, уларнинг кетма-кетлигидан қатъи назар, бир хил балл берилиши талаб этилади. Кенгроқ тушунтирилганда, ‘чексиз танлов’ фақат тест синови топшириладиган фанлари бир хил бўлган таълим йўналишлари доирасида амал қилади. Бу ўзгариш ҳам абитуриентларнинг ўқишга кириш имкониятини кескин оширади, — дейди Мажид Каримов.
Шунингдек, Давлат тест маркази директори тест синови жараёнларининг шаффофлиги, адолатлилигини таъминлашда инсон омилини камайтириш йўлида қатор ишлар олиб борилаётганини маълум қилган. Қайд этилишича, Давлат тест маркази ахборот хавфсизлиги борасида тегишли идоралар билан биргаликда иш олиб боради.
Аввалроқ Ўзбекистонда кириш имтиҳонида энг юқори балл тўплаган 200 нафар талабага Президент гранти берилиши маълум бўлганди.
Изоҳ (0)