Sardoba toshqinidan jabrlangan aholi uchun qurilgan uylar narxi 855,4 milliard so‘mni tashkil etdi, deya ma’lum qildi Sirdaryo viloyati hokimi o‘rinbosari O‘lmasjon Mamadaminov.
Uning ma’lum qilishicha, 4790 nafar xonadon egalariga 186,6 milliard so‘m moddiy yordam mablag‘lari plastik kartalarga tushirilgan. Shundan, 4541 ta fuqaroga 181,6 milliard so‘m (40 million so‘mdan) va 249 ta fuqaroga 5 milliard so‘m (20,0 million so‘mdan) berilgan.
Toshqin oqibatida uy-joylariga jiddiy zarar yetgan fuqarolar uchun jami 52,5 ga yer maydonlari tanlanib, shartnoma bo‘yicha 855,4 milliard so‘mga teng 2640 ta xonadonli 86 ta ko‘p qavatli turar joy qurildi.
Ta’kidlanishicha, 2 577 ta xonadon respublika, viloyat va tumanlar ishchi guruhlari hamda jamoatchilik vakillari tomonidan o‘rganilib, qur’a tashlash yo‘li bilan egalariga topshirilgan.
Sardoba toshqinidan jabr ko‘rganlarga uy-joylar taqsimlanishida birinchi navbatda hujjatlarida muammosi bo‘lmagani uchun 1430 ta xonadon egalariga to‘g‘ridan to‘g‘ri berilgan.
Ko‘p qavatli uylarning 1-qavatiga birinchi navbatda oilasida nogironligi bo‘lgan bolalar yoki og‘ir nogironlikka olib keluvchi kasallikka chalingan bolalar, yolg‘iz pensionerlar joylashtirilgan.
Shuningdek, muammo va kamchiliklari bo‘lgan 724 ta hujjatlar Xalq deputatlari tuman kengashlari sessiyalarida ko‘rib chiqilib, sessiya qarorlariga asosan uy ajratilishi rad etilgan.
Jumladan, 187 tasini — yashaydigan uyi bo‘lgani uchun, 232 ta xonadonga tegishli uylar — Qurilish nazorat inspeksiyasi tomonidan yaroqli deb topilgani sababli va 298 ta xonadon — qurilishi yakunlanmagani, kadastr hujjatlarini rasmiylashtirish uchun qurilgan vaqtinchalik uylar ekanligi aniqlangan.
Eslatib o‘tamiz, 2020-yilning 1-may kuni Sirdaryo viloyatida joylashgan Sardoba suv omborida to‘g‘on o‘pirilishi yuz berdi (to‘g‘on 2010—2017-yillarda 1,2 trillion so‘m evaziga qurilgan). Hodisa oqibatida viloyatning Sardoba, Oqoltin va Mirzaobod tumanlaridagi, shuningdek, Qozog‘istonning Maqtaaral tumanidagi aholi punktlari va ekinlarga zarar yetdi, binolar, yo‘llar, kommunikatsiyalar vayron bo‘ldi. Hodisa oqibatida, so‘nggi ma’lumotlarga ko‘ra, olti kishi halok bo‘lgan, 90 mingga yaqin aholi evakuatsiya qilingan.
Dastlab hodisaga kuchli yomg‘ir va shamol sabab bo‘lgani haqida taxminlar ilgari surildi, biroq keyinroq voqea yuz berishi arafasida kuchli shamol va yog‘ingarchilik kuzatilmagani, hodisaga loyiha hujjatlaridagi, qurilishdagi va ekspluatatsiyadagi xato va kamchiliklar sabab bo‘lgani ma’lum qilindi. Bosh prokuraturaning iyul oyi oxiridagi bayonotida ish bo‘yicha qamoqqa olinganini e’lon qildi, keyinroq oktabr oyida ishga 17 kishi gumonlanuvchi sifatida jalb etilgani ma’lum bo‘ldi.
Izoh (0)