Samarqandda IIB nazoratidagi 185 nafar shaxsning ozodlikni cheklash jazosi bekor qilinib, ozodlikdan mahrum qilish jazosiga almashtirildi. Bu haqda “Daryo”ga viloyat IIB axborot xizmati xabar berdi.
Ta’kidlanishicha, 2020-yil viloyatda probatsiya nazoratida bo‘lgan shaxslarning 355 nafarining o‘talmay qolgan jazo muddati og‘irroq jazo turiga, xususan, 185 nafarining jazosi ozodlikdan mahrum etish jazosiga almashtirilgan.
Aniqlanishicha, IIB probatsiya nazoratidagi 6 379 nafar shaxsning 3 793 nafari bevosita ozodlikdan mahrum etish bilan bog‘liq bo‘lmagan jazo muddatini o‘tayotgan bo‘lsa, 2 586 nafari ro‘yxat hisobiga olingan.
“O‘tgan yili belgilangan jazoni namunali o‘tagan 2 667 nafar nazoratdagi shaxsning o‘talmay qolgan jazosi muddatidan ilgari tugatilib, ular shartli ravishda ozod etildi. Ammo berilgan imkoniyatdan to‘g‘ri foydalanmasdan, tayinlangan jazoni o‘tashdan qasddan bo‘yin tovlaganlarning jazosi og‘irlashtirildi”, — deyiladi viloyat IIB axborotida.
Izoh (0)