Сардоба тошқинидан жабрланган аҳоли учун қурилган уйлар нархи 855,4 миллиард сўмни ташкил этди, дея маълум қилди Сирдарё вилояти ҳокими ўринбосари Ўлмасжон Мамадаминов.
Унинг маълум қилишича, 4790 нафар хонадон эгаларига 186,6 миллиард сўм моддий ёрдам маблағлари пластик карталарга туширилган. Шундан, 4541 та фуқарога 181,6 миллиард сўм (40 миллион сўмдан) ва 249 та фуқарога 5 миллиард сўм (20,0 миллион сўмдан) берилган.
Тошқин оқибатида уй-жойларига жиддий зарар етган фуқаролар учун жами 52,5 га ер майдонлари танланиб, шартнома бўйича 855,4 миллиард сўмга тенг 2640 та хонадонли 86 та кўп қаватли турар жой қурилди.
Таъкидланишича, 2 577 та хонадон республика, вилоят ва туманлар ишчи гуруҳлари ҳамда жамоатчилик вакиллари томонидан ўрганилиб, қуръа ташлаш йўли билан эгаларига топширилган.
Сардоба тошқинидан жабр кўрганларга уй-жойлар тақсимланишида биринчи навбатда ҳужжатларида муаммоси бўлмагани учун 1430 та хонадон эгаларига тўғридан-тўғри берилган.
Кўп қаватли уйларнинг 1-қаватига биринчи навбатда оиласида ногиронлиги бўлган болалар ёки оғир ногиронликка олиб келувчи касалликка чалинган болалар, ёлғиз пенсионерлар жойлаштирилган.
Шунингдек, муаммо ва камчиликлари бўлган 724 та ҳужжатлар Халқ депутатлари туман кенгашлари сессияларида кўриб чиқилиб, сессия қарорларига асосан уй ажратилиши рад этилган.
Жумладан, 187 тасини — яшайдиган уйи бўлгани учун, 232 та хонадонга тегишли уйлар — Қурилиш назорат инспекцияси томонидан яроқли деб топилгани сабабли ва 298 та хонадон — қурилиши якунланмагани, кадастр ҳужжатларини расмийлаштириш учун қурилган вақтинчалик уйлар эканлиги аниқланган.
Эслатиб ўтамиз, 2020 йилнинг 1 май куни Сирдарё вилоятида жойлашган Сардоба сув омборида тўғон ўпирилиши юз берди (тўғон 2010—2017 йилларда 1,2 триллион сўм эвазига қурилган). Ҳодиса оқибатида вилоятнинг Сардоба, Оқолтин ва Мирзаобод туманларидаги, шунингдек, Қозоғистоннинг Мақтаарал туманидаги аҳоли пунктлари ва экинларга зарар етди, бинолар, йўллар, коммуникациялар вайрон бўлди. Ҳодиса оқибатида, сўнгги маълумотларга кўра, олти киши ҳалок бўлган, 90 мингга яқин аҳоли эвакуация қилинган.
Дастлаб ҳодисага кучли ёмғир ва шамол сабаб бўлгани ҳақида тахминлар илгари сурилди, бироқ кейинроқ воқеа юз бериши арафасида кучли шамол ва ёғингарчилик кузатилмагани, ҳодисага лойиҳа ҳужжатларидаги, қурилишдаги ва эксплуатациядаги хато ва камчиликлар сабаб бўлгани маълум қилинди. Бош прокуратуранинг июль ойи охиридаги баёнотида иш бўйича қамоққа олинганини эълон қилди, кейинроқ октябрь ойида ишга 17 киши гумонланувчи сифатида жалб этилгани маълум бўлди.
Изоҳ (0)