Toshkentda 2020-yilning dekabr oyi oxirlarida yangi gaz taqsimlash tarmog‘i qurilishi boshlangani haqida xabar berilgan edi. “Hududgazta’minot” matbuot xizmatining ma’lum qilishicha, qurilish ishlari yakunlanmoqda.
Xabarda aytilishicha, ushbu obyektning qurilishi, avvalo, mavjud gaz taqsimlash tizimi infratuzilmasini kengaytirish zarurati bilan bog‘liq bo‘lib, bu o‘z navbatida poytaxtning me’moriy qiyofasini yaxshilash bilan bir qatorda, yangidan yangi turar joy massivlarini loyihalashtirish hamda qo‘shimcha ishlab chiqarish quvvatlarini yaratishga yordam beradi.
Diametri 1020 mm va uzunligi qariyb 8 kilometrni tashkil etuvchi yangi gaz taqsimlash tarmog‘i 13 ta avtomobil yo‘li va 2 ta kollektorni kesib o‘tadi. Sergeli tumanidagi qurilish maydonchasiga 7930 metr quvur yetkazib berilib, shundan bugungi kunga qadar 6100 metr quvurlarni o‘rnatish ishlari yakunlandi.
Obyektdagi qurilishga 80 ga yaqin mutaxassis va 22 ta maxsus texnika jalb qilingan bo‘lib, barcha ish jarayonlari “Hududgazta’minot”ning maxsus shtabi tomonidan nazorat qilinmoqda.
“Gaz taqsimlash tarmog‘ining foydalanishga topshirilishi poytaxtimiz yagona gaz tarmog‘i halqasini yaratish va buning natijasida iste’molchilarga barqaror tabiiy gaz yetkazib berishni ta’minlaydi, xususan, Chilonzor, Uchtepa, Yakkasaroy, Mirobod va Shayxontohur tumanlarining tabiiy gaz ta’minotini tubdan yaxshilash imkonini beradi”, — deyiladi xabarda.
Ma’lumot uchun, bugungi kunda Toshkentda 671 mingdan ziyod jismoniy va 13 mingga yaqin ulgurji iste’molchilar mavjud bo‘lib, ularga 2021-yilda 4 milliard metr kubdan ziyod tabiiy gaz yetkazib berilgan, bu o‘tgan 2019-yilga nisbatan 10 foizga ko‘p.
Eslatib o‘tamiz, 2020-yil 16-dekabr kuni Prezident Shavkat Mirziyoyev boshchiligida o‘tkazilgan videoselektor yig‘ilishida davlat rahbari elektr energiyasi, tabiiy gaz va ko‘mir ta’minoti masalalariga ham to‘xtalib o‘tgandi. Ta’kidlanishicha, O‘zbekistonda bugungi kunda gaz ta’minotida sutkasiga 20 million metr kub tanqislik mavjud.
Izoh (0)