Chirchiq shahar prokurori Baxtiyor Ibrohimov Bosh prokuraturaning Ichki ishlar organlarida qonunchilik ijrosi ustidan nazorat boshqarmasi boshligi o‘rinbosari lavozimiga tayinlandi. Bu ma’lumotni Bosh prokuratura matbuot kotibi Hayot Shamsutdinov “Daryo”ga tasdiqladi. Prokuror Toshkent viloyati bosh infeksionisti Guljahon Yo‘ldoshevaning ishi sudgacha yetib bormasidan uni aybdor degan fikrni ilgari surgan.
8-sentabr kuni Guljahon Yo‘ldoshevaga nisbatan Jinoyat kodeksining 167-moddasi 3-qismi “a” bandi (o‘zlashtirish yoki rastrata yo‘li bilan talon-toroj qilish, juda ko‘p miqdorda) hamda 207-moddasi 3-qismi “a” bandi (mansabga sovuqqonlik bilan qarash odam o‘lishiga sabab bo‘lsa) bilan ayblanuvchi tariqasida ishga jalb qilingan edi.
“Gazeta.uz”ning yozishicha, 13-sentabrga kelib OAVlarda Chirchiq shahar prokurori Baxtiyor Ibrohimovning intervyusi chiqa boshladi. Prokuror unda tergovga qadar tekshiruv ishlari yakun topmagan, aybi hali to‘liq isbotlanmagan Guljahon Yo‘ldoshevaning ayblilik masalasiga keskin munosabat bildirgan edi. Bu bilan u aybsizlik prezumpsiyasiga amal qilmagan.
Shundan so‘ng “Xabar.uz”da taniqli advokat Usmonxon Salohiddinovning mazkur holatga munosabati ham e’lon qilindi. Advokat o‘shanda “…prokuror janoblari mazkur intervyusida amaldagi jinoyat protsessual qonunchilik talablariga zid ravishda, hali tergovoldi harakatlari olib borilayotgan jinoyat ishi bo‘yicha tergov ma’lumotlarini oshkor qilishi o‘z-o‘zidan savol tug‘diradi: Jinoyat ishi dastlabki bosqichda ekanini tan olgan prokuror ayblov sudda nafaqat tasdiqlanishi, balki dalillar rad etilishi ham mumkinligini bilmaydimi yoki bila turib, qonunga zid tarzda bo‘lsa-da jamoat fikrini shakllantirishni, shu orqali sudga ta’sir o‘tkazishni maqsad qilganmi?”, — deya fikr bildirgan edi.
Shuningdek, Salohiddinov prokurorning Konstitutsiyaning 26-moddasi (“jinoyat sodir etganlikda ayblanayotgan har bir shaxsning ishi sudda qonuniy tartibda, oshkora ko‘rib chiqilib, u aybi aniqlanmaguncha aybdor hisoblanmaydi”) hamda amaldagi Jinoyat protsessual kodeksining 23-moddasi (“Gumon qilinuvchi, ayblanuvchi yoki sudlanuvchi uning jinoyat sodir etishda aybdorligi qonunda nazarda tutilgan tartibda isbotlangunga va qonuniy kuchga kirgan sud hukmi bilan aniqlangunga qadar aybsiz hisoblanadi”) talablarini ham mensimaganini qo‘shimcha qilgandi.
Tergov yakunlanib, ish sudga oshirilgan vaqtda advokat Xushnud Ahrorov “Gazeta.uz”ga Yo‘ldoshevaning cheklovlari juda qat’iylashtirilgani, uy qamog‘idagi shaxsga o‘rnatilgan “braslet” (elektron kuzatish vositasi) yetmaganidek, tibbiy yordamga borib-kelishda ham ichki ishlar xodimlari tomonidan nazorat qilinayotgani va ortiqcha bosim o‘tkazilayotganini ma’lum qilgan edi.
27-noyabr kuni Yo‘ldosheva va boshqalarga oid jinoyat ishi Jinoyat ishlari bo‘yicha Chirchiq shahar sudida ko‘rila boshlandi. Majlisda shifokorning advokati Xushnud Ahrorov “Dastlabki tergov organi jinoyat ishi boshidan to yakuniga qadar himoyam ostidagi Guljahon Yo‘ldoshevani nima bo‘lsa-da, ayblashga qaratilganiga guvoh bo‘lmoqdamiz”, — deb ta’kidlagandi.
11-yanvar kuni bo‘lib o‘tgan navbatdagi sud majlisi oldidan Yo‘ldosheva maktabda o‘qiydigan farzandlariga bosim bo‘layotgani, uning uyi atrofida noma’lum shaxslar tomonidan unga qarshi ma’lumotlar to‘planayotgani hamda Xalq deputatlari Chirchiq shahar Kengashi deputati Jahongir To‘laganov tomonidan ijtimoiy tarmoqlar orqali o‘ziga nisbatan haqiqatga to‘g‘ri kelmaydigan yolg‘on ma’lumotlar tarqatilayotganini aytgandi.
Hozirda ish Jinoyat ishi bo‘yicha Chirchiq shahar sudi raisi Sunnatillo Avlakulov boshchiligida ko‘rib chiqilmoqda. Unda besh nafar gumonlanuvchining 20 ta epizoddan iborat ayblov xulosasi bo‘yicha ko‘rsatuvlari tinglandi. Endilikda sudda guvohlar ko‘rsatuvlar bermoqda. Navbatdagi sud majlisi 1-fevral sanasiga belgilangan.
Izoh (0)