AQSh prezidenti Jo Bayden Made in America (“Amerikada ishlab chiqarilgan”) to‘g‘risidagi qarorni imzolaganidan so‘ng jurnalistlar oldida chiqish qildi. Mazkur hujjat Amerikadagi ishlab chiqarishlarga mo‘ljallangan va federal hukumatlar ko‘proq Amerika tovarlarini xarid qilishiga yo‘naltirilgan. Xususan, Bayden hukumat avtoparkini mahalliy sharoitda yig‘ilgan elektrokarlarga almashtirish niyatida, deb xabar beradi Motor.
Bunga qadar federal agentliklar lokalizatsiya ulushi 50 foizdan kam bo‘lmagan avtomobillarni xarid qila olardi, biroq endilikda ushbu talab yanada qat’iylashtiriladi. Bayden o‘z tashabbusi avtomobil sektorida milliondan ortiq ish o‘rinlarini yaratishiga va AQSh elektromobillar ishlab chiqarishdagi yetakchiga aylanishiga umid qilmoqda.
2019-yil holatiga ko‘ra, federal hukumat parkida qariyb 650 mingta avtomobil mavjud bo‘lib, ularning 245 mingi fuqarolik, 173 mingi harbiy va 225 mingtasi pochta mashinalari hisoblanadi. Yillik xaridlarga sarflanadigan xarajatlar 600 milliard dollarga baholangan.
Bayden hukumat avtoparkidan o‘rin oladigan aniq bir ishlab chiqaruvchilar yoki elektrokar modellarini keltirib o‘tmagan. Biroq taxminlarga ko‘ra, ular qatoridan Tesla, Rivian va Lordstown modellari o‘rin oladi.
Avvalroq AQShda bir marta quvvatlanish orqali 1,6 ming kilometr yo‘l bosa oladigan uch g‘ildirakli elektrokar taqdim etilgan edi.
Izoh (0)