Niderlandiyada 2011-yili buyurtma asosida yig‘ilgan noyob Maybach 57S kupesi sotuvga qo‘yildi. Auto Leitner dilerining Instagram va Facebook’dagi sahifalarida yozilishicha, ushbu modelni liviyalik inqilobchi Muammar Kaddafi buyurtma qilgan, deb yozadi Motor.
Diler eksklyuziv Maybach 57S uchun 961 950 yevro so‘ramoqda. Ikki xil original rang va yorqin sariq rangli charm salonga ega kupe 612 ot kuchini taqdim etishga qodir V12 motorli standart Maybach 57 bazasida yaratilgan. Sotuvchining ta’kidlashicha, 2011-yildan buyon avtomobil 2300 kilometr yo‘l bosgan.
Ayrim ma’lumotlarga ko‘ra, nomida S qo‘shimchasiga ega “o‘qlangan” versiyalar boshqa atelyelar tomonidan ishlab chiqarilgan (masalan, Xenatec) va ularning dunyoda 10—20 nusxasi bor xolos.
Facebook foydalanuvchilari e’londagi mashinaning old o‘rindiqlariga e’tibor qaratib, avtomobil rostdan ham 3 ming kilometrdan kamroq yo‘l bosganiga shubha bildirgan. Shuningdek, avtomobil Kaddafi uchun yig‘ilgani ham turli savollarni yuzaga keltirgan.
2012-yilda Maybach alohida mustaqil brend bo‘lishdan to‘xtagan. Markaning tugatilishiga uning mashinalariga Rolls-Royce va Bentley’ga qaraganda talabning kamligi sabab bo‘lgan. 2014-yilda Maybach Mercedes-Benz’ning bo‘linmasi sifatida qayta faoliyat boshlagan. O‘shanda bozorda Mercedes-Maybach S600, oradan besh yil o‘tgach, Mercedes-Maybach GLS paydo bo‘lgan.
Izoh (0)