Harris Poll tahliliy agentligi Cadillac buyurtmasiga asosan AQSh aholisining necha foizi mexanik uzatmalar qutisiga ega avtomobilni boshqarishga qodir ekanligini aniqlash maqsadida tadqiqot o‘tkazdi. Yo‘l-yo‘lakay amerikaliklar bu turda boshqariladigan mashinalarga munosabatini ham so‘zlab bergan, deb yozadi Motor.
Ma’lum bo‘lishicha, so‘rovda ishtirok etgan amerikaliklarning 66 foizi uchta tepkiga ega mashinani boshqara olishini ta’kidlagan. AQShning 55 foiz aholisi mexanik uzatmalar qutisida boshqariladigan avtomobilga egalik qilganini bildirgan. Ayni vaqtida esa respondentlarning 30 foizigina “mexanika”ga “juda qiziqishini” bildirgan, xolos. So‘rovdagi har yetti nafar ishtirokchidan biri hech qachon bu kabi mashina boshqarishni xohlamasligini ma’lum qilgan.
Harris Poll mutaxassislar so‘rovnomani onlayn ravishda to‘rt mingdan ortiq katta yoshdagi amerikaliklar orasida o‘tkazgan bo‘lib, tadqiqot mualliflari respondentlarning jinsi, yoshi va ijtimoiy mavqeyiga qarab ularninh fikrini bilishga uringan.
So‘rov ishtirokchilarining 60 foizga yaqini mexanik transmissiyaga yaxshi munosabatda bo‘lgan va shu kabi avtomobilni xarid qilish yoki uzoq muddatga ijaraga olish imkoniyatini istisno etmagan. Bu Cadillac uchun yaxshi yangilik bo‘lishi kerak, chunki so‘rov kompaniya rahbariyatiga 6 pog‘onali mexanik uzatmalar qutisiga ega yangi CT4-v va CT5-V Blackwing sedanlariga bo‘lgan qiziqishni asoslab berish uchun buyurtma qilingan. Yana bir ijobiy rag‘bat: “mexanika”ga bo‘lgan qiziqish asosan 18—34 yoshli aholi o‘rtasida kuzatilgan.
Izoh (0)