АҚШ президенти Жо Байден Made in America («Америкада ишлаб чиқарилган») тўғрисидаги қарорни имзолаганидан сўнг журналистлар олдида чиқиш қилди. Мазкур ҳужжат Америкадаги ишлаб чиқаришларга мўлжалланган ва федерал ҳукуматлар кўпроқ Америка товарларини харид қилишига йўналтирилган. Хусусан, Байден ҳукумат автопаркини маҳаллий шароитда йиғилган электрокарларга алмаштириш ниятида, деб хабар беради Motor.
Бунга қадар федерал агентликлар локализация улуши 50 фоиздан кам бўлмаган автомобилларни харид қила оларди, бироқ эндиликда ушбу талаб янада қатъийлаштирилади. Байден ўз ташаббуси автомобиль секторида миллиондан ортиқ иш ўринларини яратишига ва АҚШ электромобиллар ишлаб чиқаришдаги етакчига айланишига умид қилмоқда.
2019 йил ҳолатига кўра, федерал ҳукумат паркида қарийб 650 мингта автомобиль мавжуд бўлиб, уларнинг 245 минги фуқаролик, 173 минги ҳарбий ва 225 мингтаси почта машиналари ҳисобланади. Йиллик харидларга сарфланадиган харажатлар 600 миллиард долларга баҳоланган.
Байден ҳукумат автопаркидан ўрин оладиган аниқ бир ишлаб чиқарувчилар ёки электрокар моделларини келтириб ўтмаган. Бироқ тахминларга кўра, улар қаторидан Tesla, Rivian ва Lordstown моделлари ўрин олади.
Аввалроқ АҚШда бир марта қувватланиш орқали 1,6 минг километр йўл боса оладиган уч ғилдиракли электрокар тақдим этилган эди.
Изоҳ (0)