General Motors o‘zining birinchi elektr yo‘ltanlamasini namoyish etdi (foto, video)
General Motors 1000 ot kuchiga ega o‘zining birinchi Hummer to‘liq elektropikapini taqdim etdi, deb xabar beradi TechCrunch. Elektromobil taqdimoti 2020-yilning 20-mayida o‘tkazilishi kerak edi, biroq pandemiya sabab muddat surilgan.
Pikap xuddi original Hummer kabi “jahldor” ko‘rinishga ega. Standart jamlanmadan Goodyear Wrangler Territory MT shinalari kiydirilgan 35 dyuyumli g‘ildiraklar o‘rin olgan, pastki yuza esa deyarli to‘liq po‘lat listlar bilan yopilgan. Boshqa variantda esa shinalar 37 dyuymli. Pnevmatik “podveska” tizimi avtomobilni qo‘shimcha 149 millimetrga ko‘tara oladi.
Avtomobil taxminan uch soniya ichida soatiga 100 kilometr tezlikka erisha oladi. To‘liq boshqariluvchi shassi unga Crabwalk rejimida (“Qisqichbaqa rejimi”) diagonaliga harakatlanish imkonini beradi: tezlik pastligiga old va orqa g‘ildiraklar bir xil tomonga burila oladi.
Hummer GM’ning Super Cruise yarim avtomat boshqaruv tizimi bilan jihozlangan. Akkumulyator 800 voltli quvvatlanishga ulanib, avtomobilning 160 kilometr masofa bosishiga yetadigan zaryadni 10 daqiqada taqdim etadi. Akkumulyator sig‘imi oshkor etilmagan.
Ikki uzatmali elektr Hummer EV2’ning eng hamyonbop varianti 80 ming dollar turadi — unda “pnevmopodveska” va yarim boshqariluvchi shassi bo‘lmaydi, shuningdek, quvvatlanish ham 400 voltga tushiriladi. Bu esa avtomobil bir marta quvvatlanish orqali 402 kilometrgina yo‘l bosishini ta’minlaydi xolos.
Shuningdek, 100 ming dollar evaziga xaridor 811 ot kuchi va 12 880 Nm aylanuvchi momentga ega uchta dvigatelli Hummer EV3x’ni qo‘lga kiritishi mumkin. U bir marta quvvatlanish orqali 483 kilometr yo‘l bosishga qodir. Mazkur versiya 2022-yilning kuzida sotuvga chiqadi.
Ikkita motorga ega EV2x esa 90 ming dollar narxida 2023-yil bahorida sotuvga chiqadi. Undagi elektrodvigatel 634 ot kuchi va 10 044 Nm aylanuvchi momentni taqdim etishga qodir.
Eslatib o‘tamiz, 2020-yilning General Motors o‘zining birinchi haydovchisiz avtomobilini taqdim etgan edi.
