Rossiyada samolyotlar “karshering”i paydo bo‘ldi

S7 kompaniyasi Rossiyada shaxsiy maqsadlarda yo‘lovchi samolyotlarini bron qilish servisini ishga tushirdi. Havo kemasini uydan chiqmagan holda, oddiy onlayn ro‘yxatdan o‘tish orqali amalga oshirsa bo‘ladi, deb yozadi Motor.

S7 Select servisi 96 kishiga mo‘ljallangan shaxsiy parvozlar uchun samolyotni bron qilish imkonini beradi. Ayni vaqtda shaxsiy parvozlar uchun Airbus A319 Extra Edition samolyoti mavjud bo‘lib, uning biznes-klassiga 24 nafar yo‘lovchi, ekonom-klass — 72 yo‘lovchi sig‘adi. Samolyotni bron qilish uchun yo‘nalish, sana, shuningdek, xizmat ko‘rsatish klassini tanlash lozim. Bundan tashqari, arizani rasmiylashtirish vaqtida yo‘lovchining shaxsiy ma’lumotlarini kirgizish hamda to‘lovni amalga oshirish kerak bo‘ladi.

Parvozning umumiy qiymatini hisoblashda yo‘nalish, yo‘lovchilar soni, xizmat ko‘rsatish klassi, shuningdek, yoqilg‘i va aeroportda turish xarajatlari hisobga olinadi. Shu sababli parvoz qiladigan odamlar soni qancha ko‘p bo‘lsa, sayohat shuncha arzonga tushadi.

Onlayn arizani amalga oshiriladigan parvoz kunidan kamida besh kun oldin berish kerak. An’anaviy parvozlar kabi barcha yo‘lovchilar bir sutka oldin marshrut kvitansiyalarini oladi, aeroportda esa ularni odatdagidek reysga ro‘yxatdan o‘tkazish jarayoni kutib turadi.

Hozircha “aviakarshering” xizmatlaridan faqat Rossiyada foydalanish mumkin. Shu bilan birga, shaxsiy parvozlar bitta tomonga va Moskvadan uchish orqali “borish—qaytish”ga mavjud. Keyinroq parvozlar geografiyasini kengaytirish rejalashtirilgan.