Livan shimolida joylashgan Tripoli shahrida lokdaunga qarshi namoyishchilarning huquq-tartibot organlari xodimlari bilan to‘qnashuvi sodir bo‘ldi. Besh nafar namoyishchi va uch nafar ichki xavfsizlik xodimi jarohat oldi, o‘nlab odamlar hibsga olindi, deb yozmoqda “Kommersant”.
Namoyishchilar shahar hukumati binosiga borib, cheklovlarni bekor qilishni talab qilgan. Ular huquq-tartibot organlari xodimlariga tosh otgan, ular esa bunga javoban ko‘zni yoshlantiruvchi gaz va dubinkalardan foydalangan. Favqulodda holat Livanda 8-fevralga qadar amal qiladi. Mamlakatda virus yuqtirganlar soni 282 mingdan oshdi, 2,4 ming kishi vafot etdi.
Koronavirus tufayli qo‘yilgan qattiq cheklovlarga qarshi namoyishlar Niderlandiyada ham o‘tkazildi. 24-yanvar kuni minglab namoyishchilar Niderlandiyaning shahar ko‘chalariga chiqdi. Ular cheklovlarni yumshatishni talab qildi. 2 kun davomida politsiya kamida 450 namoyishchini hibsga oldi.
Namoyishlar Amsterdam, Gelen, Rotterdam va Xertogenbos va boshqa shaharlarda bo‘lib o‘tdi. “Mamlakatning aksariyat shaharlarida yana tinchlik hukm surmoqda. Rotterdam va Xertogenbos shaharlarigina bundan mustasno, u yerdagi namoyishchilarni tarqatish uchun maxsus kuchlar yuboriladi”, — dedi politsiya boshlig‘i Villem Vuleners.
Bosh vazir Mark Ryutte voqeani tartibsizlik deb baholadi va “ularning qonuniy noroziliklarga hech qanday aloqasi yo‘q” dedi. Namoyishchilarga qarshi dubinka, ko‘zni yoshlantiruvchi gaz va suv zambaraklaridan foydalanilgan.
Avvalroq Niderlandiya bosh vaziri komendantlik soati joriy etilishi fonida uyushtirilgan tartibsizliklarni qoralagani, mamlakatda koronavirus sababli joriy qilingan karantin cheklovlarining bir qismi yumshatilgani haqida xabar berilgandi.
Undan avval Niderlandiya koronavirus tufayli Buyuk Britaniyadan reyslarni qabul qilishni to‘xtatgandi.
Izoh (0)