Ливан шимолида жойлашган Триполи шаҳрида локдаунга қарши намойишчиларнинг ҳуқуқ-тартибот органлари ходимлари билан тўқнашуви содир бўлди. Беш нафар намойишчи ва уч нафар ички хавфсизлик ходими жароҳат олди, ўнлаб одамлар ҳибсга олинди, деб ёзмоқда «Коммерсантъ».
Намойишчилар шаҳар ҳукумати биносига бориб, чекловларни бекор қилишни талаб қилган. Улар ҳуқуқ-тартибот органлари ходимларига тош отган, улар эса бунга жавобан кўзни ёшлантирувчи газ ва дубинкалардан фойдаланган. Фавқулодда ҳолат Ливанда 8 февралга қадар амал қилади. Мамлакатда вирус юқтирганлар сони 282 мингдан ошди, 2,4 минг киши вафот этди.
Коронавирус туфайли қўйилган қаттиқ чекловларга қарши намойишлар Нидерландияда ҳам ўтказилди. 24 январь куни минглаб намойишчилар Нидерландиянинг шаҳар кўчаларига чиқди. Улар чекловларни юмшатишни талаб қилди. 2 кун давомида полиция камида 450 намойишчини ҳибсга олди.
Намойишлар Амстердам, Гелен, Роттердам ва Хертогенбос ва бошқа шаҳарларда бўлиб ўтди. «Мамлакатнинг аксарият шаҳарларида яна тинчлик ҳукм сурмоқда. Роттердам ва Хертогенбос шаҳарларигина бундан мустасно, у ердаги намойишчиларни тарқатиш учун махсус кучлар юборилади», — деди полиция бошлиғи Виллем Вуленерс.
Бош вазир Марк Рютте воқеани тартибсизлик деб баҳолади ва «уларнинг қонуний норозиликларга ҳеч қандай алоқаси йўқ» деди. Намойишчиларга қарши дубинка, кўзни ёшлантирувчи газ ва сув замбаракларидан фойдаланилган.
Аввалроқ Нидерландия бош вазири комендантлик соати жорий этилиши фонида уюштирилган тартибсизликларни қоралагани, мамлакатда коронавирус сабабли жорий қилинган карантин чекловларининг бир қисми юмшатилгани ҳақида хабар берилганди.
Ундан аввал Нидерландия коронавирус туфайли Буюк Британиядан рейсларни қабул қилишни тўхтатганди.
Изоҳ (0)