2020-yilda dunyo bo‘yicha mudofaa xarajatlari 1,9 foizga o‘sdi, deb yozadi “RBK” mudofaa sohasidagi ochiq ma’lumotlarni tahlil qilish bilan shug‘ullanuvchi Janes agentligiga tayanib.
O‘tgan yilda xarajatlarning umumiy hajmi 1,93 trillion dollarni tashkil etgan, 2019-yilda u 1,8 trillion dollarga teng bo‘lgan. 2010-yilda esa xarajatlar o‘tgan yilgidan 180 milliard dollarga kamroq bo‘lgan.
2020-yilda xarajatlar eng ko‘p Yevropa mamlakatlarida o‘sdi — ular bir yil avvalgidan 5,6 foizga ko‘proq bo‘ldi. 2021-yilda xarajatlar o‘sishi biroz sekinlashadi, degan fikrda tahlilchilar. Bu yil mudofaa xarajatlarining sekinlashishiga COVID-19 pandemiyasi oqibatlari sababchi bo‘ladi, ammo xarajatlarning qisqarishi neft kabi xomashyo mahsulotlari eksportiga bog‘liq bo‘lgan mintaqalar bilan chegaralanib, hamon barqaror o‘sish kutilayotgan mintaqalardagi oshish bilan muvozanatlashib ketadi, deyiladi hisobotda.
“Yevropa, Osiyo-Tinch okeani va Lotin Amerikasidan tashqari barcha mintaqalar, ehtimol, 2021-yilda qisqartirishni amalga oshirishi tufayli, mudofaa xarajatlarning umumiy o‘sishi 2013-yildan (1,53 trillion dollar) buyon eng past darajagacha tushib ketadi… COVID-19 pandemiyasining moliyalashtirishga nisbatan eng kuchli ta’siri 2022-yilda — hukumatlar xarajatlarni cheklashni boshlaganida yuz berishi mumkin”, — deb hisoblaydi Janes yetakchi tahlilchisi Endryu Makdonald.
Uning ma’lumotlariga ko‘ra, ijobiy o‘sish asosan Osiyo hisobiga saqlanib qoladi, inqiroz yillaridan keyin esa mudofaa uchun xarajatlar o‘sishi yana tezlashishi mumkin, shu sababli tahlilchilar 2030-yilga kelib xarajatlar 2,23 trillion dollar darajasida bo‘lishini prognoz qilmoqda.
Asosiy o‘sish manbalaridan biri Osiyo mamlakatlari bo‘ladi. 2010-yilda bu mintaqadagi mamlakatlarga barcha xarajatlarning 20 foizi to‘g‘ri kelgan bo‘lsa, 2028-yilga kelib, bu 35 foiz atrofida bo‘lishi kutilmoqda.
Izoh (0)