Rossiya prezidenti Vladimir Putin Korrupsiyaga qarshi kurash fondi (KKF) surishtiruvida tilga olingan Gelinjikdagi qasrga na u, na uning qarindoshlari egalik qilishini bildirdi. Bu haqda u 25-yanvar — Talabalar kuni munosabati bilan Rossiya oliygohlari talabalari bilan uchrashuvda aytib o‘tdi.
“Men bu filmni ko‘rganim yo‘q, chunki bunaqa ma’lumotni ko‘rib chiqish uchun shunchaki bo‘sh vaqtim yo‘q. Lekin yordamchilarim olib kelgan videojamlanmalarga ko‘z yugurtirib chiqdim. Savolingizga birdan javob bermoqchiman: u yerda mening mulkim sifatida ko‘rsatilgan narsalarning hech biri na menga, na mening yaqin qarindoshlarimga tegishli emas va hech qachon tegishli bo‘lmagan. Hech qachon”, — dedi Vladimir Putin.
Prezident “qasr” mavzusi o‘n yildan ortiq vaqt davomida muhokama qilinayotgani va shuncha yildan buyon ushbu mulk bilan — yer uchastkalarining rasmiylashtirilishi, moliyaviy provodkalar bilan bog‘liq hujjatlar qolgan bo‘lishi kerakligini ta’kidladi.
“Bularning o‘rniga mening suratimni, batterflay usulidagi suzishimni men hech qachon bormagan va ko‘rmagan qanaqadir basseynga joylashtirishgan. Lekin men shunaqa suzganman. Yeniseyda 2016-yilda. Bu shunchaki quramachilik, montaj. Bizning mashhur personajlarimizdan birining tili bilan aytganda: ‘Bu zerikarli, qizlar’. Hech bo‘lmasa, bironta yangi narsa o‘ylab topishsa bo‘lardi”, — dedi u.
Bir necha oylik Germaniyadagi davolanish va qayta tiklanishdan so‘ng, 17-yanvar kuni Aleksey Navalniy Rossiyaga qaytib keldi. Qaytib kelishi bilan uni Rossiya militsiyasi qo‘lga oldi.
19-yanvarda asoschisi muxolifatchi Aleksey Navalniy bo‘lgan Korrupsiyaga qarshi kurash fondi “Putin uchun qurilgan qasr” haqida katta tadqiqotni e’lon qildi. YouTube tarmog‘iga joylangan mazkur video qisqa vaqt ichida bir necha milliondan ortiq tomosha qilingan va katta shov-shuvga sabab bo‘lgan. Aleksey Navalniy iddao qilishicha, Rossiya prezidenti Gelenjik yaqinida, Qora dengiz sohilida “butun boshli qirollik”ga egalik qiladi, uning maydoni “Monakodek 39 ta knyazlik hududiga teng”. Fond xabar berishicha, majmuaning qurilishini bir qator kompaniyalar, shu jumladan, “Rosneft” va “Transneft” davlat kompaniyalari qalbaki ijara to‘lovlari va boshqa korrupsiyaviy sxemalar yordamida moliyalashtirgan. Tadqiqot mualliflari bu sxemani “dunyodagi eng katta pora” deb atab, qasr va uzumzorlarga sarflangan jami pul qiymatini kamida 100 milliard rubl (1,35 milliard dollar)ga baholamoqda.
Aleksey Navalniy hibsga olinganidan keyin videomurojaat yo‘llab, o‘z tarafdorlarini namoyishlarga chiqishga da’vat etgan. Shundan so‘ng, 23-yanvar kuni Rossiyaning o‘nlab shaharlarida Aleksey Navalniyni qo‘llab-quvvatlab mitinglar o‘tkazildi.
OAVning xabar berishicha, mazkur aksiya Rossiyadagi so‘nggi o‘n yillardagi eng yirik namoyish bo‘lgan. Aksiyalar chog‘ida butun Rossiya bo‘ylab 3352 kishi qo‘lga olingan. Bunday ma’lumotlarni 24-yanvar kuni ertalab “OVD-Info” keltirib o‘tdi.
Norozilik aksiyalarini izohlar ekan, Vladimir Putin: “Barcha odamlar siyosiy faoliyat, o‘z fikrini ifodalash, o‘z fikrini jamoatchilik ongiga havola etish huquqiga ega. Ammo qonun doirasida. Huquq-tartibot organlari ham qonun doirasida harakat qilishi kerak”, — dedi.
Izoh (0)