Koronavirusga qarshi kurashda yaxshi natijalarga erishilganiga qaramay, uni yengish qiyin bo‘ladi. Bu haqda JSSTning sog‘liqni saqlash sohasidagi favqulodda vaziyatlar bo‘yicha dasturining ijrochi direktori Maykl Rayan brifing davomida ma’lum qildi, deb xabar beradi “RBK”. U COVID-19 endemik kasallikka aylanishini istisno etmagan — uni butunlay yo‘qotish juda mushkul.
“Insoniyat hozircha faqat qorachechakni yengishga muvaffaq bo‘lgan”, — deydi Rayan. Poliomielit va qizamiq kabi kasalliklarni hozirga qadar butunlay yo‘qotishning imkoni bo‘lmagan.
Shu sababli koronavirusni yengish ham oson bo‘lmaydi: chunki COVID-19 dunyoning deyarli barcha mamlakatlarida tarqalib ulgurdi, vaksinadan foydalanishga esa hozircha hammaning ham qurbi yetmaydi.
Davlatlar koronavirus oqibatida yuzaga keladigan o‘lim holatini kamaytirish va normal hayot tarziga qaytish imkoniyati bor, biroq vaksinatsiya keng tarqalmasa, COVID-19 bilan kasallanish davom etaveradi.
Brifing davomida JSST rahbari Tedros Gebreyesus “vaksina natsionalizmi” jahon iqtisodiyotiga 9 trillion dollardan ortiq zarar keltirishi mumkinligini ma’lum qilgan, xususan, ushbu mablag‘larning yarmi — 4,5 trillion dollar rivojlangan davlatlar hisobiga to‘g‘ri keladi.
Jons Hopkins universiteti ma’lumotlariga ko‘ra, butun dunyoda koronavirusga chalinganlar soni 100 million kishiga yaqinlashmoqda, hozirga qadar 2,1 million bemor COVID-19 qurboniga aylangan.
Eslatib o‘tamiz, AQShda 14-dekabr kuni koronavirusga qarshi Pfizer/BioNTech vaksinasi bilan, 18-yanvardan esa Rossiyada “Sputnik V” vaksinasi bilan ommaviy emlash boshlangan.
Izoh (0)