Koronavirus pandemiyasi so‘nggi 100 yillikdagi eng kuchli iqtisodiy inqirozga olib keldi. Bu haqda Birlashgan Millatlar Tashkiloti (BMT) bosh kotibi Antoniu Guterrish aytib o‘tdi, deb yozadi “RBK”.
Uning so‘zlariga ko‘ra, dunyoning bugungi holatini “mo‘rtlik” degan so‘z bilan tavsiflash mumkin.
“Ikki milliondan ortiq odam vafot etdi va biz qariyb 100 yil ichidagi eng yomon iqtisodiy inqirozga tushib qoldik. Biz buni odamlar va mamlakatlar o‘rtasidagi tengsizlikda ko‘rib turibmiz, buni pandemiya bor bo‘yi bilan namoyon qildi. Ayollar, xususan, ish yo‘qotish va parvarish qilish bo‘yicha qo‘shimcha tashvishlardan qattiq jabr ko‘rdi. Biz, shuningdek, iqlim va bioxilma-xillik inqirozlaridagi beqarorlikni ham ko‘ryapmiz”, — dedi Guterrish.
Uning ta’kidlashicha, 2021-yilda dunyo yetakchilari yo‘nalishni o‘zgartirish va to‘g‘ri yo‘nalishda harakatlanish orqali dunyoni to‘g‘ri yo‘lga yo‘naltirishi kerak. “Biz COVID-19 pandemiyasidan keyingi qayta tiklanishimizdan foydalanib, zaiflikdan barqarorlikka o‘tishimiz kerak”, — dedi Guterrish.
Shu bilan birga, u mavjud xavflar va to‘siqlarni bartaraf qilish uchun muzokaralar va hamkorlik talab qilinishini eslatdi. “Hukumatlar, xalqaro tashkilotlar, xususiy sektor va fuqarolik jamiyati, shaharlar birga ishlashi kerak”, — dedi BMT bosh kotibi.
U, shuningdek, koronavirusga qarshi vaksinaning bir tekisda taqsimlanmasligi masalasini yana ko‘tardi. Vaksinalar asosan rivojlangan mamlakatlarga kelib tushayotgani, pastroq daromadli davlatlar esa vaksinasiz qolayotganini aytdi. Bosh kotib vaksinaga global jamiyat farovonligi deb qarab, eng nochor mamlakatlarni vaksina bilan ta’minlashga yo‘naltirilgan COVAX tashabbusini moliyalashtirishga chaqirdi.
Izoh (0)