“Daryo”ga Samarqand shahar “Ali Qushchi” mahallasida yashovchi fuqaro Zuhra Qiyomova murojaat qilib, sud qaroriga asosan farzandini turmush o‘rtog‘idan olish bo‘yicha qaror chiqarilgan bo‘lsa-da, tuman Ichki ishlar organlari faoliyatini muvofiqlashtirish bo‘limi va Majburiy ijro byurosi tuman bo‘limi o‘z vazifasiga sovuqqonlik qilayotganini bayon qildi.
“Toki sud qarori ijrosi bo‘yicha MIBga ishim tushmaguniga qadar, bu tashkilot, xususan, Chiroqchi tumani xodimlarining bu qadar mas’uliyatsiz, fuqarolarni istagancha aldashi mumkinligini tasavvur ham qilmagandim. Chiroqchi tuman MIBning sud qarorini ijro etmayotgani yuzasidan kelgan murojaat bilan tanishsangiz, barchasiga amin bo‘lasiz. Agar MIB xohlamasa, har qanday sud qarorini istagan vaqtgacha ijro etmay yuraverar ekan”, — deydi Zuhra Qiyomova.
Ma’lum bo‘lishicha, Samarqand shahrida yashovchi Zuhra Qiyomova fuqarolik ishlari bo‘yicha Chiroqchi tuman sudi qarori ijrosini ta’minlashni so‘rab, bir yildan beri MIB, prokuratura, ichki ishlar organlarining tumandan tortib, respublika idoralarigacha murojaat qilgan. Ammo tuman MIB baribir sud qarorini ijro etmagan.
“Bir yildan ortiq vaqt davomida o‘z o‘g‘limni qaytarib ololmay, sarsonman. Sud 2020-yilning 6-yanvar kuni Chiroqchi tumanida yashovchi fuqarolar (sobiq turmush o‘rtog‘i, qaynona va qaynotasi) qaramog‘idan farzandimni olib berish to‘g‘risida qaror chiqargandi. Mana, oradan bir yil o‘tdi hamki tuman MIB sud qarorini ijro etmayapti. Butun mamlakatdagi biror-bir tashkilot ana shu sud qarori ijrosini ta’minlashda menga yordam ko‘rsata olmayapti. 2020-yil 3-iyul kuni ish sudda qaytadan kassatsiya tartibida ko‘rilib, bolani menga olib berish to‘g‘risidagi oldingi sud qarorini o‘z kuchida qoldirilgan. Ammo undan keyin ham baribir sud hujjati ijro etilmasdan qolmoqda”, — deydi Zuhra Qiyomova.
Zuhra Qiyomovaning ta’kidlashicha, u o‘tgan vaqt davomida bir necha marotaba Bosh prokuraturaga (1007), Respublika majburiy ijro byurosiga (1107) telefon orali murojaat qilgan. Uning murojaati yozib olinib, savollar berilgan. Ammo bu yozishmalar tuman MIBga ta’sir etmagan.
“Tuman MIBga murojaat qilsam ‘delo Chiroqchi tuman IIBda, ular qidiruvga bergan’, deb aytishdi. Tuman IIBdagilar esa ‘ish tuman MIBda ular ijro qilishi kerak’ deb javob berishadi. Aynan Chiroqchi tuman idoralari ustidan Ichki ishlar vazirligiga qilgan murojaatim esa shunchaki manzilimga qarab, Samarqand viloyat IIBga yuborilgani hammasidan oshib tushdi. Nihoyat huquq-tartibot idoralari hech qachon qonun ustuvorligini ta’minlab bermasligiga ko‘zim yetgach, Oliy Majlis Senatiga murojaat qildim. Yaqinda natijasini so‘rab qo‘ng‘iroq qilsam, murojaatim Senatdan Mahalla va oilani qo‘llab-quvvatlash vazirligiga yuborilganini aytishdi. Holbuki, men ungacha bu vazirlikka allaqachon murojaat qilganman va vazirlik vakillari o‘z vazifasini tushuntirib, ular sud qarori ijrosi bilan shug‘ullanmasligini ma’lum qilib bo‘lishgandi. Endi men kimga murojaat qilishim kerak?”, — deydi Zuhra Qiyomova.
Mazkur holat yuzasidan Mahalla va oilani qo‘llab-quvvatlash vazirligi vakili bilan bog‘langanimizda haqiqatan ham Zuhra Qiyomovaning Chiroqchi tuman MIB tomonidan sud qarori ijro etilmayotgani yuzasidan murojaati Oliy Majlis Senatidan vazirlikka 2021-yilning 4-yanvar kuni kelib tushgani va o‘rganilayotgani ma’lum qilindi.
MIB Chiroqchi tuman bo‘limi boshlig‘idan holatga izoh so‘raganimizda Zuhra Qiyomovaning farzandi Chiroqchida ko‘rsatilgan manzildan topilmagani sababli xat bilan Chiroqchi tuman IIO FMBga qidiruv uchun berilgani, ish bu tashkilotga o‘tgani bois ham ijro harakatlari to‘xtatilgani ma’lum qildi. Ammo Qashqadaryo viloyat IIB axborot xizmati bu ma’lumotni rad etib, mazkur ish bilan Chiroqchi tuman MIBning o‘zi shug‘ullanayotganini, bu tashkilotga tuman IIO FMB tomonidan javob xati yuborilganini ma’lum qildi.
Qashqadaryo viloyat MIB va IIB axborot xizmatlarining holatga bergan izohi bir-biriga zid bo‘lib qolmoqda.
Zuhra Qiyomovaning ta’kidlashicha, sudda javobgarlar, ya’ni bola kimlarda ekani aniq aytilgan, ularning manzili ham aniq, qanday qilib shuncha oy davomida “izquvarlar” bolaning qayerda ekanini bilolmasligi mumkin? Ikkinchi tomondan esa IIB axborot xizmati ish allaqachon tuman MIBga o‘tgani va ular bolani olib berishi lozimligini aytib kelmoqda. Darhaqiqat, sansalorlik bu tarzda davom etadigan bo‘lsa, sud qarori qachondir ijro etilishi ham gumon.
Muammodan ko‘rinadiki, tizimda bu kabi yechimini kutayotgan holatlar yana uchrashi (balki ko‘plab uchrayotgandir) tabiiy. Shu sababdan holatga izoh so‘rash bilan birga respublika Majburiy ijro byurosiga bir qator ochiq savollar bilan murojaat qilmoqchimiz.
Bugungi kunda bolani majburiy olib berish to‘g‘risida fuqarolik sud hujjatlarining ijrosini ta’minlash jarayonida bolani qidirish ishlari qaysi tashkilot tomonidan olib borilmoqda? Bolani majburiy tartibda olib berishga oid fuqarolik ishlari bo‘yicha sud hujjatining ijrosini ta’minlash borasida bola belgilangan manzilda topilmasa, uni qaysi davlat organi qidirishi kerak? Agar javobgarlar bolani berishdan bosh tortib, noma’lum manzilga yashirgan taqdirda MIB organlari qanday qonuniy harakat qilishlari lozim?
“Daryo” voqealar rivojini kuzatishda davom etadi.
Izoh (0)