Qashqadaryodagi mavjud yer-maydonlari yashil, sariq va qizil toifaga ajratilgani ma’lum qilindi

Qashqadaryodagi mavjud 2 million 856 ming 799 gektar yer-maydoni o‘rganishlarga ko‘ra, yashil, sariq va qizil toifaga ajratildi. Bu haqda Davlat kadastrlari palatasining viloyat boshqarmasi boshlig‘i G‘ayrat Hamroyev ma’lum qildi, deya xabar berdi “Daryo” muxbiri.

Ta’kidlanishicha, Davlat kadastrlari palatasining Qashqadaryo viloyati boshqarmasi tashabbusi bilan hududda faoliyat yurituvchi jurnalist va blogerlar uchun press-tur tashkil etilgan.

Unda so‘z olgan boshqarma boshlig‘i G‘ayrat Hamroyev viloyatdagi mavjud yer-maydonlarini aniqlash va ularning nima maqsadda foydalanilayotganini bilish uchun xatlov o‘tkazilganini ma’lum qilgan.

“Viloyatda 2 million 856 ming 799 gektar yer-maydoni mavjud bo‘lib, qishloq xo‘jaligi yerlari 2 million 179 330 gektarni, aholi punkti 151 909 gektarni, o‘rmon fondi yerlari esa 410 215 gektarni, sanoat, transport va boshqa yerlar 71 774 gektarni, tarixiy-ma’daniy yerlar 2 567 gektarni, suv fondi yerlari 37 175 ming gektarni, zaxira yerlar 3 819 gektarni tashkil qiladi”, — dedi boshqarma boshlig‘i.

Boshqarma boshlig‘ining aniqlik kiritishicha, viloyatda xatlov jarayonlari 2020-yilning 17-noyabridan boshlangan bo‘lib, ikki oy davom etgan. Xatlov natijasiga ko‘ra, viloyatdagi yer-maydonlarining hujjati mavjud yoki mavjud emasligiga qarab yashil, sariq va qizil toifaga ajratilgan.

“Yashil toifaga 227 131 ta ko‘chmas mulk va yer-maydonlari kiritilgan bo‘lib, bunday yerlar jismoniy va yuridik shaxslarga tegishli bo‘lgan, egalik huquqi mavjud, davlat ro‘yxatidan o‘tkazilgan va kadastr yig‘ma jildlari to‘g‘ri shakllantirilgan, rasmiylashtirish ishlari yakunlangan yerlar hisoblanadi. Sariq toifadagi yerlar va obyektlar esa 478 889 tani tashkil etib, bunday yerlar egalik huquqi mavjud bo‘lib, kadastr hujjati qilinmagan yerlar hisoblandi. Qizil toifadagi yerlar hamda obyektlar viloyatda 19 467 ta bo‘lib, ularga egalik huquqi berilmagan va bunday huquq berilishi mumkin bo‘lmagan obyektlar va yerlar hisoblanadi”, — dedi G‘ayrat Hamroyev.

G‘ayrat Hamroyevning qo‘shimcha ma’lumot berishicha, xatlovdan avval viloyatdagi mavjud yer-maydonlarining atigi 6 foizi — 171 400 gektar yer davlat ro‘yxatidan o‘tkazilgan bo‘lsa, qolgan 94 foiz yer — 2 million 685 ming 400 gektar yer davlat hisobida bo‘lmagan.