“Daryo”ga Buxoro viloyatining Shofirkon tumanidagi “Quyi chuqurak” mahallasida joylashgan “Miskinato” qabristonini ta’mirlash hamda mahallada jamoatchilik asosida aholini ish bilan ta’minlashda talon-torojliklarga yo‘l qo‘yilgani haqida murojaat kelib tushdi.
Shikoyat qanchalik o‘rinli ekanligini o‘rganish maqsadida “Daryo” muxbiri aytilgan manzilda bo‘ldi.
Ma’lum bo‘lishicha, “Quyi Chuqurak” MFY raisi Jasur Nasullayev “Miskinato” qabristonining yer uchastka maydonidan tushgan 13 million 500 ming so‘m pulni noqonuniy sarflagan. “Mazkur pullarning 7,5 million so‘mini Akmal Jo‘rayev, qolgan 6 million so‘mini esa uning ukasi Hazrat Jo‘rayev naqd shaklida bergan”, — deydi tumandagi 33-maktab direktori Muhammad Aminov.
Aytilishicha, 2019-yilda “Miskinato” qabristoni tevaragidagi 1 gektarga yaqin yerdan tushadigan hosil mahalla raisi hamda to‘rt nafar mahalla faolining og‘zaki kengashuvi bilan 11 million so‘m deb baholangan. Shunga ko‘ra, qabriston atrofidagi yer maydoniga vaqtincha egalik qilayotgan Akmal Jo‘rayevdan mahalla komissiyasiga 11 million so‘m miqdorida pul topshirish talab qilingan. Biroq, Akmal Jo‘rayev oilaviy sharoiti sabab buncha to‘lovni amalga oshira olmasligini tushuntirgan.
“Avvaliga mahalla raisi 11 million pul to‘lashim kerakligini aytdi. Texnika vositalari xizmatidan foydalanish, shuningdek, suv ta’minoti, madaniy va mineral o‘g‘itlar keltirishdan tashqari, bu miqdordagi to‘lovni amalga oshirishga mening sharoitim to‘g‘ri kelmadi. Keyin 8 million topshirishim kerakligi aytildi. Rad etdim va og‘zaki kelishuvga ko‘ra, 7 million so‘mga rozi bo‘ldim”, — deydi Akmal Jo‘rayev.
Ta’kidlanishicha, 7 million so‘mlik to‘lov fuqaro tomonidan ikki marotaba amalga oshirilgan. Pullar mahalla fuqarolar yig‘ini yoxud tuman obodonlashtirish boshqarmasi kirim kassasiga emas, balki J.Nasullayev, R. Sa’dullayev, U. Hamidov, N.Nafasovlardan iborat mahalla komissiyasi a’zolariga topshirilgan.
“Birinchi to‘lov 2 million 40 ming so‘m edi. Men ushbu pulga qabriston atrofini o‘rash maqsadida devor tiklash uchun 3 tonna sement oldim. Keyingi to‘lov — 4 million 960 ming so‘m esa devorni tiklash uchun shlakobloklar xarid qilishga hamda obodonlashtirishga sarflandi”, — deydi Akmal Jo‘rayev.
Akmal Jo‘rayevning bildirishicha, 2020-yilda qabriston atrofidagi mazkur yer maydonidan foydalanish ukasi Hazrat Jo‘rayevga berilgan.
“Quyi chuqurak” mahalla raisi Jasur Nasullayevning bildirishicha, Hazrat Jo‘rayevga 2020-yilda qabriston atrofidagi yer maydonidan foydalanishi uchun undan olinadigan hosildorlikka qarab, 7 million so‘m to‘lovni amalga oshirishi bildirilgan. Biroq, 6 million so‘m olingan.
MFY raisiga ko‘ra, qabriston atrofini obodonlashtirish, ayvon tiklash va old qismini devor bilan o‘rash ishlariga ayni paytga qadar 17 million 200 ming so‘m sarflangan va hali ishlar to‘la yakuniga yetmagan.
“Shunga ko‘ra, yer maydoni hosildorligidan tushgan 13,5 million so‘mning talon-taroj qilingani haqidagi shikoyat o‘rinsiz”, — deydi mahalla raisi.
“Daryo” muxbiri ushbu masalaga oydinlik kiritish maqsadida Buxoro viloyat Soliq boshqarmasining jismoniy shaxslarga soliq solish bo‘limi boshlig‘i Zikrilla Fatullayev bilan suhbatlashdi.
“Ma’lumki, qabristonlarni obodonlashtirish mahalla aholisi ko‘magida hashar yo‘li bilan ham amalga oshirilishi mumkin. Qabriston atrofidagi yerlar davlat mulki hisoblanib, ijara shartnomasi tuzmasdan yerni ijaraga berish noqonuniy hisoblanadi. Shuningdek, yerning hosildorligidan foydalanib, tushgan mablag‘larni qabriston ta’mirlanishiga qanday sarflash lozimligi me’yoriy hujjatlarda qayd etilgan. Yuqoridagi holat bo‘yicha esa qabriston atrofidan foydalanayotgan fuqaro og‘zaki kelishuvga asosan pulni mahalla faollari, ya’ni komissiyaga keltirib topshiryapti. Bilishimizcha, bu pullar hech qayerga kirim qilinmagan, o‘rtada o‘zaro dalolatnoma tuzilgan, xolos. Biroq, ushbu mablag‘lar tuman obodonlashtirish boshqarmasi hisob raqamiga kirim qilinishi va so‘ngra maqsadlarga yo‘naltirilishi lozim edi. Ushbu holatda qonun buzilishi yuzaga kelgan”, — dedi boshqarma mas’uli.
Mahalla ahli MFY raisi jamoatchilik asosida ishga jalb qilinganlarga maosh to‘lashda ham adolatsizlikka yo‘l qo‘yganini aytmoqda.
Mahalla fuqarolari — Qurbon Aminov hamda Guljahon Rahmonovalar 2020-yilning aprel va iyul oylarida jamoatchilik asosidagi mehnatga jalb qilinganini, biroq, ikki oy davomida ishlamay 750 ming so‘mdan ish haqi olganini bildirdi. “Ayni o‘sha paytda Qurbon Aminov boshqa tumanda chakana ish bilan shug‘ullangan, Guljahon Rahimova esa uyda o‘tirgan, ishlamagan”, — deyiladi murojaatda.
Qurbon Aminov hamda Guljahon Rahimovalar esa pandemiyada ishsiz qolgani sabab mahalla raisiga murojaat qilishganini va jamoatchilik ishiga jalb etilib, maosh olganini bildirdi.
“Ma’lumki, jamoatchilik ishi ko‘cha va xiyobonlarni supurish ishlari bilan bog‘liq. Ko‘proq bu ishga ayollar jalb etilgani uchun men o‘zimda noqulaylik sezib, o‘rnimga turmush o‘rtog‘imni yubordim. Guljahon esa kelinim, farzandi bilan bir haftacha kasalxonada davolanib chiqqan davrda ham turmush o‘rtog‘im jamoatchilik ishini bajardi. 750 ming so‘m pullar plastik kartamizga kelib tushdi va bu pullarni biz pandemiya davrida ro‘zg‘orga sarfladik. Bizni og‘ir sharoitda qo‘llagan raisga e’tirozimiz yo‘q”, — deydi Qurbon Aminov.
Shofirkon tuman hokimligi binosida hokim, tuman obodonlashtirish boshqarmasi boshlig‘i, mahalla fuqarolar yig‘ini raisi hamda tumandagi 33-umumiy o‘rta ta’lim maktabi direktori bilan yuzma-yuz muloqotda Muhammad Aminov “Qurbon Aminov akam, Guljahon Rahimova kelinim bo‘ladi. Har bitta jiyanimning qo‘lida bittadan mashinasi bor. Yana qanday kam ta’minlanganlik bo‘yicha oylik oladi?”, — deya e’tiroz bildirdi.
Jasur Nasullayevning ta’kidicha, Qurbon Aminov oilasi kam ta’minlanganlar ro‘yxatida turmaydi. Pandemiya boshlangach, ehtiyojdan kelib chiqib, mahalla aholisining bir nechtasi jamoatchilik asosida ishlagan. Fuqaro Qurbon Aminov ukasi Muhammad Aminov rahbarligidagi maktabda qorovul vazifasida ishlab kelgan va o‘zaro kelishmovchilik sababli ishdan bo‘shagan. Oilaga ko‘mak sifatida fuqaroning murojaati qanoatlantirilgan va kelini bilan ketma-ket oylarda jamoatchilik ishiga jalb qilingan. O‘zaro ichki kelishuv asosida Qurbon Aminovni tungi qorovullikka ham qo‘ygan.
Tuman prokuraturasi ushbu holat ko‘rib chiqilayotganini va xulosa berilishini ma’lum qildi.
“Ayni paytda ushbu holat yuzasidan tuman prokuraturasi tomonidan surishtiruv ishlari boshlab yuborildi”, — dedi Shofirkon prokurori Jasur Tangriyev.
“Daryo” voqealar rivojini kuzatishda davom etadi.
Izoh (0)