Yangi Angren IESdagi portlashga qozon tozalovchilarning texnika xavfsizligiga rioya etmaganligi sabab bo‘lgani aytilmoqda

Yangi Angren IESdagi portlash yuzasidan stansiya boshqaruv kompaniyasi qo‘shimcha ma’lumotlar taqdim etdi, deya xabar bermoqda “Kun.uz”.

Ma’lumotnomada keltirilishicha, 2021-yil 20-yanvar kuni soat 11:30 da “Energoqozontozalash” mas’uliyati cheklangan jamiyati xodimlari tomonidan Yangi Angren issiqlik elektr stansiyasi 5-qozon agregatining 12,0 metrlik belgisida kulni kimyoviy tozalash paytida, ko‘mir-kukun aralashmasining chaqnashi yuzaga keldi, natijada uch kishi halok bo‘ldi, yana uch kishi turli darajada kuyish jarohati olgan.

Ushbu 5-qozon agregati vaqtincha to‘xtatilgan va u kimyoviy tozalanayotgan paytda qozon tozalovchilarning texnika xavfsizligi qoidalariga rioya etmaganligi ana shunday ayanchli oqibatlarga olib keldi.

Ushbu turdagi profilaktika ishlari ko‘mir yoqiladigan barcha elektr stansiyalari va qattiq yoqilg‘i pechlari o‘rnatilgan og‘ir sanoat korxonalarining to‘xtatilgan uskunalarida yong‘inlarning oldini olish maqsadida amalga oshiriladi va bu vazifani korxonaning o‘zi yoki shartnoma asosida ixtisoslashgan pudrat tashkilotlari bajaradi.

Chaqnash oqibatida vafot etganlar “Vostokenergoteploizolyatsiya” MChJning ishchilari bo‘lib, ushbu korxona issiqlik izolyatsiyasi va astar ishlarini bajarish bo‘yicha pudratchi ixtisoslashgan kompaniya, xodimlari qozon qoplamasidagi nuqsonlarni bartaraf etish bo‘yicha mutaxassislar hisoblanadi. Kuyish jarohati olganlar “Energoqozontozalash” MChJ qozon tozalovchilaridir.

“20-yanvar kuni ikki tomonlama shartnoma asosida ishlayotgan qozon tozalovchilarga qozon-turbina sexining 30-sonli farmoyishi bilan xavfsizlik choralari ko‘rilgan holda soat 9:30 da to‘xtatilgan qozon agregatining 12,0 metrlik belgisida profilaktika ishlari olib borishga ruxsat berilgan.

“Vostokenergoteploizolyatsiya” MChJ ishchilari ham qozon-turbina sexining 31-sonli farmoyishi bilan soat 10:30 da qozon agregatining 48,0 metrlik belgisida profilaktika ishlari olib borishga kirishgan. Texnika xavfsizligi qoidalarining qo‘pol ravishda buzilishi oqibatida “Vostokenergoteploizolyatsiya” MChJning uch xodimi halok bo‘ldi, “Energoqozontozalash” MChJning turli darajada kuyish jarohati olgan uch nafar xodimiga birinchi tibbiy yordam ko‘rsatilib, ular eng yaqin bo‘lgan shahar markaziy kasalxonasiga yetkazildi.

Ayni paytda mazkur holat yuzasidan Jinoyat kodeksining 257-moddasi 2-qismi “a, b” bandlari (mehnatni muhofaza qilish qoidalarini buzish odam o‘lishi va boshqa og‘ir oqibatlar kelib chiqishi) bilan jinoyat ishi qo‘zg‘atilgan bo‘lib, Angren shahar prokuraturasi tomonidan tergovga qadar tekshiruv harakatlari olib borilmoqda. Uning natijalari haqida qo‘shimcha ma’lumotlar taqdim etiladi. Shu munosabat bilan fuqarolardan ijtimoiy tarmoqlarda yolg‘on ma’lumotlar tarqatmasliklari so‘raladi.

“Yangi Angren IES” aksiyadorlik jamiyati tomonidan vafot etganlarning oila a’zolariga qo‘shimcha ravishda 105 million so‘mdan moddiy yordam ko‘rsatildi. Tashkilotning tegishli normativ-huquqiy hujjatlariga asosan, bunday moddiy yordam yana qo‘shimcha (to‘liq) ravishda amalga oshiriladi. Hozirda ularning oila a’zolari holidan xabar olib turilibdi. Tashkilot tomonidan moddiy va ma’naviy yordam ko‘rsatilishi, shuningdek, boquvchisiz qolgan oilalarning ishga yaroqli va ishsiz a’zolari ish bilan ta’minlanadi.

“Yangi Angren IES” aksiyadorlik jamiyati fidoyi energetiklarning vafoti munosabati bilan marhumlarning oila a’zolari va yaqinlariga chuqur ta’ziya izhor etadi. Vafot etgan xodimlarning yorqin xotirasi energetiklar qalbida doimiy saqlanib qoladi” – deyiladi taqdim qilingan ma’lumotnomada.

Eslatib o‘tamiz, 20-yanvar kuni “Yangi Angren” issiqlik elektr stansiyasining profilaktika choralarini ko‘rish uchun to‘xtatilgan 5-energiya blokida chang-ko‘mirli havo aralashmasining portlashi sodir bo‘lgan, portlash oqibatida uch kishi halok bo‘lgan va yana uch kishi jarohat olgandi. Energetika vazirligi ularning oila a’zolariga moddiy va ma’naviy yordam ko‘rsatilganini ma’lum qilgandi.

Portlash oqibatida uch kishi vafot etgani yuzasidan jinoyat ishi ochilgan. Bosh prokuratura matbuot xizmati hozirda mazkur holat yuzasidan Angren shahar prokuraturasi tomonidan tergovga qadar tekshiruv harakatlari olib borilayotganini ma’lum qilgan.

Tergovga chaqirilgani aytilayotgan, IESda sex rahbari lavozimida ishlab kelgan 40 yoshli S.Sh. 23-yanvar kuni uyida o‘zini osib qo‘ydi.