Amerikalik ayol tovug‘ining yuragini davolatish uchun 10 ming dollar sarfladi

AQShning Kolorado shtatidagi Vellington shahrida yashovchi Seleta Notnagel o‘zining Blyu nomli tovug‘ining yurak xastaligini davolash uchun 10 ming dollar sarfladi, deb yozadi Esquire.

Seleta tovug‘ini ko‘ngliga juda yaqin deb biladi. Tovuq uning uyida yashaydi, hattoki uy egasining karavotida uxlash uchun o‘z joyiga ega. Blyu pishloq, qulupnay, tarvuz va shirinliklarni yaxshi ko‘radi. Seletaning so‘zlariga ko‘ra, tovuq uning qo‘lida turishni yoqtiradi, tizzasiga joylashganda esa ko‘zlarini yumib, uyquga ketadi.

Biroq 2020-yilning mart oyida Seleta Blyudagi o‘zgarishlarni seza boshlagan. Tovuq endi egasini quchoqlashni istamas, shuningdek, holdan toygan ko‘rinishda bo‘lgan. Shundan so‘ng ayol Blyuni veterinar ko‘rigidan o‘tkazgan. Blyuda qon tahlili, rentgen, ultratovush, ekokardiogramma va kompyuter tomografiyasi o‘tkazilgan. Kuz oyiga qadar olib borilgan tekshiruvlardan so‘ng mutaxassislar tovuqning qon tomirlarida muammo borligini va bu nafas yetishmovchiligiga olib kelganligini aniqlagan.

Ushbu nuqsonni davolash bolalarda odatiy jarayon hisoblanadi. Yaqinda it va mushuklarga nisbatan ham ushbu muolaja qo‘llangan, ammo parrandalar bu borada sinab ko‘rilmagan. Operatsiya xavfli bo‘lib, taxminan, 4 ming dollarga tushishi mumkin edi, ammo busiz Blyuning hayotini saqlab qolib bo‘lmasdi.

“Men turmush o‘rtog‘imga: ‘Agar Blyu tuzalmasa, ikkimizga yetadigan qabr qazishingiz mumkin’, deb aytdim”, − deya eslaydi Seleta. 2020-yilning noyabr oyida Blyuning operatsiyasi muvaffaqiyatli o‘tib, 12 soatdan keyin tovuq odatdagi xatti-harakatiga qaytgan.

Davolanishning umumiy qiymati, taxminan, 10 ming dollarni tashkil etgan. Sug‘urta esa faqat 2,5 ming dollarni qoplagan. “Bu juda katta pul. Ammo siz buni bolalar yoki itingiz uchun qilar edingiz. Itimning yuragini davolatish uchun ham bu pulga ko‘z yumish mumkin edi. Ammo tovuq haqida gap ketganda, odamlar aytadiki: ‘Birgina tovuq uchun shuncha pul sarfladingizmi? Uni shunchaki pishirib yesangiz yoki muzlatkichga solib qo‘yish mumkin edi-ku’”, − deydi Seleta.