Uchuvchilar tomonidan 2020-yilda videoga olingan g‘ayrioddiy uchar obyektni o‘rganish uchun AQShda surishtiruv ishlari o‘tkazilib, u dron-maneken bo‘lgani aniqlandi, deb xabar beradi Hi-Tech.Mail.ru.
AQSh Fuqarolik aviatsiyasi federal boshqarmasining (FAA) aviadispetcherlik xizmatlari bilan amalga oshirgan yozishmalariga ko‘ra, “reaktiv kiyimdagi sirli inson” dron-maneken bo‘lib chiqdi. Buni uchuvchilardan biri FQBga obyekt YouTube’dagi roliklarda tasvirlangan dronga o‘xshashini aytganidan so‘ng aniqlashga muvaffaq bo‘lishgan.
Uchuvchi aynan qaysi rolik haqida aytgani noma’lum. U quyida keltiriladigan rolikni nazarda tutgan bo‘lishi mumkin. Noodatiy obyekt va dron-maneken rostdan ham bir-biriga o‘xshaydi. Sirli uchar obyektning sifatli kadrlari bo‘lmagani sabab ularni solishtirib ko‘rishning imkoni yo‘q.
Eslatib o‘tamiz, Sling Pilot akademiyasining uchuvchilari Kaliforniyadagi mashg‘ulot zonasida o‘tkazilgan sinov parvozlari vaqtida noma’lum uchar jismga duch kelgandi.
Ushbu noodatiy hodisada ishtirok etgan uchuvchilardan birining so‘zlariga ko‘ra, ular akademiyadan Santa-Katalina oroliga qarab standart marshrut bo‘yicha harakatlanayotgan bo‘lgan. Parvoz vaqtida ular havodagi noodatiy obyektga duch kelgan. U reaktiv kiyim kiyib olgan yigitga o‘xshash bo‘lib, taxminan 1 kilometr balandlikka ko‘tarilgach samolyotning o‘ng tomonidan uchib o‘tgan va ko‘zdan yo‘qolgunga qadar parvozni davom ettirgan.
Izoh (0)