Америкалик аёл товуғининг юрагини даволатиш учун 10 минг доллар сарфлади

АҚШнинг Колорадо штатидаги Веллингтон шаҳрида яшовчи Селета Нотнагель ўзининг Блю номли товуғининг юрак хасталигини даволаш учун 10 минг доллар сарфлади, деб ёзади Esquire.

Селета товуғини кўнглига жуда яқин деб билади. Товуқ унинг уйида яшайди, ҳаттоки уй эгасининг каравотида ухлаш учун ўз жойига эга. Блю пишлоқ, қулупнай, тарвуз ва ширинликларни яхши кўради. Селетанинг сўзларига кўра, товуқ унинг қўлида туришни ёқтиради, тиззасига жойлашганда эса кўзларини юмиб, уйқуга кетади.

Бироқ 2020 йилнинг март ойида Селета Блюдаги ўзгаришларни сеза бошлаган. Товуқ энди эгасини қучоқлашни истамас, шунингдек, ҳолдан тойган кўринишда бўлган. Шундан сўнг аёл Блюни ветеринар кўригидан ўтказган. Блюда қон таҳлили, рентген, ультратовуш, экокардиограмма ва компьютер томографияси ўтказилган. Куз ойига қадар олиб борилган текширувлардан сўнг мутахассислар товуқнинг қон томирларида муаммо борлигини ва бу нафас етишмовчилигига олиб келганлигини аниқлаган.

Ушбу нуқсонни даволаш болаларда одатий жараён ҳисобланади. Яқинда ит ва мушукларга нисбатан ҳам ушбу муолажа қўлланган, аммо паррандалар бу борада синаб кўрилмаган. Операция хавфли бўлиб, тахминан, 4 минг долларга тушиши мумкин эди, аммо бусиз Блюнинг ҳаётини сақлаб қолиб бўлмасди.

«Мен турмуш ўртоғимга: ‘Агар Блю тузалмаса, иккимизга етадиган қабр қазишингиз мумкин’, деб айтдим», − дея эслайди Селета. 2020 йилнинг ноябрь ойида Блюнинг операцияси муваффақиятли ўтиб, 12 соатдан кейин товуқ одатдаги хатти-ҳаракатига қайтган.

Даволанишнинг умумий қиймати, тахминан, 10 минг долларни ташкил этган. Суғурта эса фақат 2,5 минг долларни қоплаган. «Бу жуда катта пул. Аммо сиз буни болалар ёки итингиз учун қилар эдингиз. Итимнинг юрагини даволатиш учун ҳам бу пулга кўз юмиш мумкин эди. Аммо товуқ ҳақида гап кетганда, одамлар айтадики: ‘Биргина товуқ учун шунча пул сарфладингизми? Уни шунчаки пишириб есангиз ёки музлаткичга солиб қўйиш мумкин эди-ку’», − дейди Селета.