Buxoro viloyatida ko‘p miqdordagi giyohvandlik moddasini 5 million so‘mga sotayotgan shaxs qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, Buxoro tumanidagi “Bog‘ikalon” MFY Yuzon qishlog‘ida istiqomat qiluvchi 42 yoshli fuqaro tuman markazidan o‘tuvchi 4-R-68-avtomobil yo‘li bekatida tanishi J.X.ga ko‘p miqdordagi giyohvandlik moddasini 5 million so‘mga sotayotganda qo‘lga olingan.
Buxoro viloyat IIB ekspert kriminalistika bo‘limining sudga oid kimyoviy ekspertiza xulosasiga ko‘ra, 6 dona gugurt qutisiga alohida qadoqlab solingan marixuannaning sof vazni 27,3 grammga teng bo‘lgan.
Buxoro tuman IIB huzuridagi tergov bo‘linmasi katta tergovchisi Alisher Xayrullayevning bildirishicha, jinoyat ustida qo‘lga olingan F.U. 2020-yilning aprel oyi boshida tekin daromad orttirish maqsadida o‘zi istiqomat qilib kelgan hovlisining ekin yerida taqiqlangan kannabis giyohvandlik vositasini yetishtirgan. Bu xatti-harakati evaziga unga nisbatan Jinoyat kodeksining 270-moddasi 5-qismi (taqiqlangan ekinlarni yetishtirish) bilan jinoyat ishi qo‘zg‘atilgan.
Fuqaroning takroran giyohvandlik vositasini yetishtirish va uni sotishga bo‘lgan harakati sabab unga nisbatan jinoyat ishi qo‘zg‘atilib, tergov-surishtiruv harakatlari olib borilmoqda.
Izoh (0)