Qashqadaryo viloyatining Dehqonobod tumanida joylashgan 1958 nafar ishchisi mavjud bo‘lgan Dehqonobod kaliy zavodida atigi 100 nafarga yaqin dehqonobodlik mutaxassislar ishlayotgani ma’lum bo‘ldi. Bu haqda zavod direktori Oybek Qurbonov va tuman hokimi vazifasini bajaruvchi Adham Qulmamatov ishtirokidagi yoshlar bilan muloqotda ma’lum qilindi, deya xabar berdi “Daryo” muxbiri.
Ta’kidlanishicha, Dehqonobod tumanini 10 kun muddatga boshqarish huquqini qo‘lga kiritgan Adham Qulmamatov 2021-yil 20-yanvar kuni Dehqonobod kaliy zavodiga borib, yoshlarni qiynayotgan muammolarni o‘rgangan.
Zavod direktori va yoshlar o‘rtasidagi muloqotda Adham Qulmamatov zavodda ishlayotgan dehqonobodlik yosh mutaxassislar soni bilan qiziqqan.
“Shaxsan o‘zim 2016-yil Toshkent kimyo texnologiya institutining magistraturasini tamomlab, Dehqonobod kaliy zavodiga ish so‘rab borganman. Ammo ishga kirolmaganman. Oliygohga kirishdan avval tumanimizda shunday zavod borligi uchun aynan shu institutda o‘qiganman. Meni va ko‘pchilik dehqonobodlik yoshlarni qiziqtirgan savol bor. Xo‘sh, Dehqonobod tumanida joylashgan zavodda shu institutni tamomlab, ishga kirgan yoshlar necha nafar kishini tashkil qiladi?”, — deya zavod direktoriga savol bilan yuzlangan Adham Qulmamatov.
Ushbu savolga javob bergan zavod mas’ullari Dehqonobod kaliy zavodida 100 nafarga yaqin dehqonobodlik oliy ma’lumotli mutaxassislar faoliyat yuritayotganini, zavodning umumiy ishchilari soni esa 1958 nafarni tashkil qilishini ma’lum qilgan.
Adham Qulmamatovning qo‘shimcha ma’lumot berishicha, ayni kunda tuman hokimligiga 187 nafar mutaxassis zavodga ishga kirish bo‘yicha murojaat qilgan.
“Shulardan 72 nafari oliy ma’lumotli mutaxassis bo‘lib, zavodga ishga kiraman degan ishtiyoqda yuribdi. Ammo ishga kirolmayapti”, — degan hokim vazifasini bajaruvchi.
Tuman hokimligi axborot xizmatining eslatishicha, tuman hokimi Zoir Aliqulovning 2020-yil 23-dekabr kuni tumanning chekka qishlog‘idagi yoshlar bilan uchrashuvida ham 26 yoshli Nurbek Qo‘yliyev zavodga ishga kirolmay yurganini aytib, shikoyat qilgan.
Hokim bilan muloqot qilgan fuqaro “Mutaxassisliging to‘g‘ri kelmaydi deyishdi, vaholanki zavodning mexanika bo‘limida ishlovchilar ham men tugatgan institutni, men o‘qigan fakultetni tamomlagan”, degan.
Eslatib o‘tamiz, 2020-yil 17-yanvar kuni Qashqadaryo hokimi Zoir Mirzayev o‘rinbosarlari va 15 nafar hudud hokimi tibbiy ko‘rikdan o‘tish hamda davolanish maqsadida Toshkent shahriga jo‘nab ketgandi. Ularning o‘rnini esa yoshlar egallab, 10 kun muddatga hududni boshqarishga kirishgan.
Izoh (0)