Бухоро вилоятида кўп миқдордаги гиёҳвандлик моддасини 5 миллион сўмга сотаётган шахс қўлга олинди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, Бухоро туманидаги «Боғикалон» МФЙ Юзон қишлоғида истиқомат қилувчи 42 ёшли фуқаро туман марказидан ўтувчи 4-Р-68-автомобиль йўли бекатида таниши Ж.Х.га кўп миқдордаги гиёҳвандлик моддасини 5 миллион сўмга сотаётганда қўлга олинган.
Бухоро вилоят ИИБ эксперт криминалистика бўлимининг судга оид кимёвий экспертиза хулосасига кўра, 6 дона гугурт қутисига алоҳида қадоқлаб солинган марихуаннанинг соф вазни 27,3 граммга тенг бўлган.
Бухоро туман ИИБ ҳузуридаги тергов бўлинмаси катта терговчиси Алишер Хайруллаевнинг билдиришича, жиноят устида қўлга олинган Ф.У. 2020 йилнинг апрель ойи бошида текин даромад орттириш мақсадида ўзи истиқомат қилиб келган ҳовлисининг экин ерида тақиқланган каннабис гиёҳвандлик воситасини етиштирган. Бу хатти-ҳаракати эвазига унга нисбатан Жиноят кодексининг 270-моддаси 5-қисми (тақиқланган экинларни етиштириш) билан жиноят иши қўзғатилган.
Фуқаронинг такроран гиёҳвандлик воситасини етиштириш ва уни сотишга бўлган ҳаракати сабаб унга нисбатан жиноят иши қўзғатилиб, тергов-суриштирув ҳаракатлари олиб борилмоқда.
Изоҳ (0)