Qashqadaryoning Yakkabog‘ tumanida yashovchi fuqaro shafqatsizlarcha kaltaklanib, qiynoqqa solindi. Bu haqda IIV Tergov departamenti xabar berdi.
Ma’lum qilinishicha, jabrlanuvchi fuqaro K.A. 17-yanvar kuni tuman IIB boshlig‘i nomiga ariza bilan murojaat qilgan. Unda aytilishicha, 15-yanvar kuni soat 10:00 da sinfdoshi A.Q. va uning turmush o‘rtog‘i G.A. telefon orqali o‘zlarining Qurashayx qishlog‘idagi uyiga chaqirgan. K.A. chaqirilgan uyning ayvoniga kirgan vaqtida A.Q. uni urib oyoq va qo‘llarini arqon bilan bog‘lab, yuz, bosh va son sohalariga tayoq bilan qasddan urgan. Bundan tashqari, ro‘zg‘or kapgirini uydagi temir pechda qizdirib, K.A.ning qorin sohasiga bir necha marta bosib kuydirgan. Shu sababli K.A. holat bo‘yicha qonuniy chora ko‘rishni so‘ragan.
Tibbiy ma’lumotnomaga asosan K.A.da bosh miya chayqalishi, boshning tepa va chap chakka sohasida qon quyilishi, peshona sohasida ezilib, yirtilgan yara, qorin pastki sohasi kuygan jarohati va boshqa tan jarohatlari mavjudligi qayd etilgan.
Mazkur holat yuzasidan Yakkabog‘ tuman IIB huzuridagi tergov bo‘limi tomonidan Jinoyat kodeksining 110-moddasi 1-qismi (qiynash) bilan jinoyat ishi qo‘zg‘atilgan.
Dastlabki tergov harakatlari davomida A.Q. ishlash maqsadida Rossiyaga ketgan vaqtida jabrlanuvchi K.A. uning turmush o‘rtog‘i G.A.ning oldiga kelib turganligi aniqlangan.
Bundan tashqari, K.A. 15-yanvarda shifoxonaga murojaat qilgan vaqtida yuqoridagi janjalni yashirgan holda otdan yiqilib, uni ot sudrab ketganligini aytgan Birinchi yordamni olib shifoxonadan chiqib ketganligi aniqlangan.
Hozirda tergov harakatlari olib borilmoqda.
Izoh (0)