Qashqadaryo viloyati hokimi Zoir Mirzayev bugungi kun amaldorlari haqida gapirib, “xalq dardini eshitmaydigan amaldorning umri uzoq bo‘lmasligini” ta’kidladi.
Bu haqda xabar bergan “Daryo” muxbirining yozishicha, viloyat rahbari amaldorlar haqida Prezident murojaatnomasiga bag‘ishlangan yig‘ilishda ma’lum qilgan.
“Odamlarimizning talabchanligi, ya’ni qonunlarimizni bilishi va mamlakatda bo‘layotgan o‘zgarishlarni kuzatib borayotganligi natijasida ayrim amaldorlarning aybi ham ochib tashlanmoqda. Bunda OAV vakillari va blogerlarning hissasi katta — buni ular fosh qilmoqda. Men ilgari ham aytganman, rahbar jurnalist va blogerlar oldiga o‘zi chiqib, xalqqa shaxsan o‘zi hisob berishi kerak. Matbuot anjumani o‘rniga o‘rinbosarini yoki biror-bir bo‘lim boshlig‘ini yuborishi bu — bo‘lmaydigan ish. Nega rahbarning shaxsan o‘zi xalq oldiga chiqib, ochiq-oydin gapirolmaydi? Buning ikkita sababi bor. Birinchi sababi shundan iboratki, o‘sha rahbarning jurnalist va blogerlar savollariga javob berishga saviyasi yetmaydi. Ikkinchidan esa o‘sha rahbar OAV vakillari va blogerlardan qanday savol berilishini biladi va bu savoldan qochadi. Bugun bunday rahbarlarning zamoni emas. Zamonning o‘zi bunday rahbarlarni chetga chiqarib tashlaydi”, — dedi viloyat rahbari.
Viloyat hokimi Zoir Mirzayev hamma rahbarlar ham jurnalist va blogerlar tomonidan qilinayotgan tanqidni to‘g‘ri qabul qilolmasligini tan olgan.
“Tanqidni ko‘tarolmaydigan, xalq murojaatini tinglamaydigan rahbar xoh u amaldor bo‘lsin, xoh uning yordamchisi yoki bo‘lim boshlig‘i umri uzoq bo‘lmaydi”, — dedi Zoir Mirzayev.
Eslatib o‘tamiz, avvalroq Zoir Mirzayev Qarshi tumanida xalqqa hokimsiz murojaatnoma yo‘llanganini tanqid qilib, jurnalist va blogerlar oldiga to‘g‘ridan to‘g‘ri chiqolmaydigan rahbarlarni “U yo saviyasiz, yoki savollardan qo‘rqadi” degandi.
Mavzuga doir:
Izoh (0)