Toshkent viloyati Qibray tumanida tadbirkorga bog‘dorchilik va chorva mollariga yaylov uchun 460 gektar yerni ajratib berish evaziga 3,7 million dollar so‘ragan shaxs ushlandi. Bu haqda “O‘zbekiston 24” telekanali orqali ma’lum qilindi.
Ma’lum qilinishicha, qibraylik tadbirkor bog‘dorchilik va chorva mollariga yaylov uchun yer ajratilishini so‘rab, o‘zi yashayotgan tuman hamda Toshkent viloyatining boshqa tumanlari hokimliklariga murojaat qilgan, biroq bu kutilgan natijani bermagan.
Uning muammosidan xabar topgan Toshkent viloyatida faoliyat yurituvchi chorvachilikka ixtisoslashgan “A.M.B.” mas’uliyati cheklangan jamiyat rahbari T.Q. ushbu jamiyatga tegishli Quyi Chirchiq tumanidagi 360 gektar sug‘oriladigan yerni va hozirda norasmiy foydalanib kelayotgan tuman zaxirasidagi 100 gektar yerni uning nomiga o‘tkazib berishini aytib, evaziga 3,7 million AQSh dollari so‘ragan.
Shuningdek, bu ishlarni rasmiylashtirib berish uchun Quyi Chirchiq tumani hokimligidagi mansabdor shaxsga berishini aytib, yana 20 ming dollar talab qilgan.
DXX va Bosh prokuratura huzuridagi departament xodimlari tomonidan o‘tkazilgan tezkor tadbir davomida T.Q. tadbirkordan jami 3,72 million AQSh dollarini olgan vaqtida ashyoviy dalillar bilan ushlangan.
Hozirda unga nisbatan Jinoyat kodeksining 168 va 211-moddalari (firibgarlik, pora berish) bilan jinoyat ishi qo‘zg‘atilib, tergov harakatlari olib borilmoqda.
Avvalroq Bo‘stonliqdagi 1 gektar yerni rasmiylashtirib berish uchun 160 ming dollar talab qilgan shaxs qo‘lga olingani, Toshkent viloyatida 60 ming dollarga yer sotmoqchi bo‘lgan tuman hokimi o‘rinbosari ushlangani, Yunusobod tumani hokimining qurilish ishlari bo‘yicha o‘rinbosari 5 ming dollar pora bilan qo‘lga tushgani, shuningdek, Chilonzor tuman hokimligi bo‘lim boshlig‘i 50 ming dollar pora bilan ushlangani to‘g‘risida xabar berilgandi.
Izoh (0)