“Barselona” hujumchisi Lionel Messi Ispaniya Superkubogi finali doirasida “Atletik B”ga qarshi kechgan o‘yindagi (2:3) harakati tufayli ikkita o‘yinga diskvalifikatsiya qilindi.
Shu tariqa argentinalik futbolchi Ispaniya Kubogi doirasidagi “Kornelya” va La Ligadagi “Elche”ga qarshi bahslarni o‘tkazib yuboradi.
Eslatib o‘tamiz, Messi uchrashuvning qo‘shimcha bo‘limlari tugayotgan bir vaqtda “Atletik” futbolchisi Asyer Vilyalibrening bosh qismiga qo‘li bilan zarba bergandi. Natijada hakam Xesus Xil Mansano videotakrorlardan keyin Leoga to‘g‘ridan to‘g‘ri qizil kartochka ko‘rsatdi.
Avvalroq agar Messining bu harakati agressiv deb baholansa, futbolchi 4 o‘yindan 12 o‘yingacha diskvalifikatsiya olishi mumkinligi xabar qilingandi. Biroq Musobaqalar o‘tkazish qo‘mitasi Lionelning harakatlarida agressivlik ko‘rmagan.
Eslatib o‘tamiz, Messi “Barselona” safida ilk bor, 753 o‘yin deganda birinchi marta qizil kartochka oldi. Avvalroq u Argentina terma jamoasi safida ikki bor maydondan chetlatilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)