“Milan” klubi xorvatiyalik hujumchi Mario Manjukich bilan shartnoma imzolaganini ma’lum qildi.
Manjukich milanliklar bilan 2020/21-yilgi mavsum so‘ngiga qadar kelishuvga imzo chekkan. Shartnomani natijalarga qarab 1 yilga uzaytirish imkoniyati bor. Mario yangi jamoasida 9-raqam ostida harakat qiladi.
Xorvatiyalik futbolchi professional futbolchilik faoliyatini 2004-yil “Marsoniya” klubida boshlagan. Keyin esa “Zagreb” va Zagrebning “Dinamo”sida harakat qilgan. 2010-yilda Germaniyaga ko‘chib o‘tgan. U yerda “Volfsburg” (60 ta o‘yin, 20 ta gol) va “Bavariya” (88 ta o‘yin, 48 ta gol) sharafini himoya qilgan. 2014/15-yilgi mavsum Madridning “Atletiko”sida (43 ta o‘yin, 20 ta gol) o‘ynagan. Keyin “Yuventus”ga o‘tib, turinliklar safida 5 mavsumda 162 ta o‘yinda ishtirok etib, 44 ta gol urgan. 2020-yil yanvarida esa Qatarning “Al-Duhayl” klubiga o‘tgan. 2020-yil iyulidan erkin agent maqomida edi.
Manjukich faoliyati davomida 24 ta jamoaviy sovrin yutgan. Mario Xorvatiya terma jamoasi tarixidagi ikkinchi raqamli eng yaxshi to‘purar hisoblanadi. Uning hisobida terma jamoa libosida 89 ta o‘yinda urilgan 33 ta gol mavjud.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)