Fransiyada ayol uch yildan beri o‘zining tirikligini isbotlashga urinmoqda

Fransiya sudi tomonidan vafot etdi deb e’lon qilingan 58 yoshli Janna Pushen uch yildan beri tirikligini rasman isbotlashga urinib keladi. Bu haqda The Guardian xabar bermoqda.

Lion shahri yaqinidagi Sen-Jozef kommunasida yashovchi Pushen xonimning vafot etgani to‘g‘risida sudning qarori 2017-yilning noyabrida e’lon qilingan. Mazkur qaror Pushen xonimga tegishli tozalash kompaniyasida ishlagan sobiq xodimning ko‘rsatmasiga binoan qabul qilingan.

“Advokat yoniga borganimda, u shifokorim tirikligimni tasdiqlasa, muammo tezda hal bo‘lishini aytdi. Ammo unday bo‘lmadi”, — deydi Pushen xonim jurnalistga.

Advokat ham mazkur holatdan ajablandi: “Bu ahmoqlik. Sudning dalillarsiz bunday qaror chiqarishi aqlga sig‘maydi. Da’vogar hech bir isbotsiz Pushen xonimni vafot etdi deb aytgan va hamma unga ishongan. Biror kim tekshirib ko‘rmagan”, — deydi u AFP’ga.

Xabarlarga ko‘ra, 2004-yilda sud Pushen xonimga firmasi yirik shartnomani qo‘ldan boy bergan paytda ishdan haydalgan sobiq xodimlaridan biriga yetkazilgan 14 000 yevro zararni to‘lash majburiyatini yuklagan edi. Bu masala shaxsan Pushen xonimga emas, balki uning kompaniyasiga taalluqli bo‘lgani uchun qaror ijrosiz qolgan. 2009-yilda xodim yana sudga murojaat qildi, ammo ish suddan olib tashlandi. Xodim sobiq rahbariga yozgan xatlariga javob kelmayotganini va uning vafot etganini aytdi.

2016-yil Pushen xonim vafot etdi deb topilgan hamda apellyatsiya sudi zararni to‘lash vazifasini uning o‘g‘li va eriga yukladi. Pushen xonim rasmiy qaydlardan o‘chirib tashlandi. Uning pasporti, haydovchilik guvohnomasi, hisob raqami, tibbiy sug‘urtasi va uning mavjudligini isbotlovchi boshqa rasmiy hujjatlar bekor qilindi.

Advokat sobiq xodimni Pushen xonimning merosxo‘rlaridan zararni undirish uchun uning o‘limini o‘ylab topganlikda aybladi. Sobiq xodimning advokati esa Pushen zararni to‘lashdan hamda aybini tan olishdan bo‘yin tovlab, o‘z o‘limiga mualliflik qilgan deya qarshi bahslashmoqda.

“Shaxsimni tasdiqlovchi birorta hujjat yo‘q, hech qaysi idoraga tirikligimni isbotlay olmayapman… Men hech kimman”, — deydi Pushen xonim. “Bu holatga chek qo‘yadigan vaqt keldi. Agar o‘zim kurashmasam, men uchun hech kim kurashmaydi. Qaynanam 102 yoshda. U umri davomidan ko‘p narsalarni, hatto jahon urushini ham ko‘rgan bo‘lsa-da, hech qachon menchalik aziyat chekmaganini aytadi”, — deydi Pushen xonim.