2018-yilda Sedzi Morimoto professional bekorchi sifatida “ishga joylashgan”. Esquire’ning yozishicha, 2,5 yillik faoliyati davomida u 30 million iyena (290 ming dollar) ishlab topgan.
37 yoshli Sedzi shunchaki pul uchun odamlar bilan vaqt o‘tkazadi. Shu bilan birga, u hech qanday o‘ziga xoslik haqida va’da bermaydi — u shunchaki keladi, ovqatlanadi, oddiy maslahatlar beradi, bir so‘z bilan aytganda, hamrohlik qiladi. Hozirda Morimotoning xizmati 10 ming iyena turadi. Bundan tashqari, uning transport va ovqatlari xarajati uchun ham to‘lash kerak.
Barchasi Morimoto kunlarning birida Twitter’da post qoldirganidan so‘ng boshlangan.
“Men o‘zimni hech qanday ish qilmaydigan inson sifatida ijaraga taqdim etaman. Do‘konga bir o‘zingiz borishga qiynalyapsizmi? Jamoada o‘yinchi yetmayaptimi? Siz uchun o‘rin egallaydigan inson kerakmi? Men yengil vazifalardan boshqasini qila olmayman”, — deb yozgan u o‘z tivitida.
Natijada Sedzining xizmatlari mashhurlikka erishib, uch ming marotabadan ortiq foydalanilgan.
Avvaliga u bularning barchasini bepul qilgan, biroq vaqt o‘ta boshlagach so‘rovlarni kamaytirish maqsadida xizmat haqi ola boshlagan. Odatda u bir kunda 3—4 nafar mijoz bilan ko‘rishadi.
Morimotoning so‘zlariga ko‘ra, unga turli odamlar murojaat qiladi. Ayrimlar yolg‘izlikdan aziyat cheksa, ba’zilari zerikkanidan. Uni tushlik qilish uchun, Instagram’ga suratga tushish, bog‘da kapalak tutish, tibbiyot xodimining og‘ir mehnati to‘g‘risidagi gaplarni eshitish, ajrashayotgan odamga hamrohlik qilish uchun yollashgan.
Bir inson Sedzini sodir etgan qotilligi to‘g‘risida so‘zlab berish uchun yollagan bo‘lsa, boshqa bir kishi undan o‘z joniga qasd qiladigan joyga olib borishni so‘ragan.
Morimotoning o‘zi oila qurgan, oliy ma’lumotli va fizika bo‘yicha olimlik darajasiga ega. “Bekorchilik” karyerasiga qadar u nashriyotda ishlagan.
Izoh (0)