Avstraliya hukumati 13 ming kilometr masofani bosib o‘tib, AQShdan tasodifan mamlakatga yetib kelgan Jo ismli poyga kaptarini evtanaziya — infeksiya yordamida o‘ldirishga qaror qilgani to‘g‘risida xabar berilgandi. Mamlakat Qishloq xo‘jaligi va suv resurslari vazirligi mazkur holat bo‘yicha rekshiruv o‘tkazib, kaptar Qo‘shma Shtatlardan kelmagan bo‘lishi mumkinligini ma’lum qildi.
Avstraliya Qishloq xo‘jaligi va suv resurslari vazirligi “AQShdan uchib kelgan” Jo laqabli kaptar haqida tarqalgan yangiliklardan so‘ng tekshiruv o‘tkazgan. Avvaliga mamlakat hukumati qush kasallik tashuvchisi bo‘lishi mumkinligi sabab uni infeksiya yordamida o‘ldirishga qaror qilgandi. Biroq keyinroq qush Qo‘shma Shtatlardan kelmagan bo‘lishi mumkinligi aytildi.
Qush haqida birinchi bo‘lib Melburn yaqinida istiqomat qiluvchi Kevin Selli-Byord so‘zlab bergan. U chanqab ketgan kaptarga 2020-yilning dekabrida orqa hovlisida duch kelgan va uni ovqatlantirgan. Shuningdek, erkak qush panjasidagi bog‘ichni payqab qolgan va u AQShdan kelgan “poyga kaptari” ekanligini aniqlagan. Ushbu ma’lumotni kaptarlar poygasiga bog‘liq Oklaxomadagi tashkilot ham tasdiqlagan. Selli-Byord kaptarga AQShda saylangan prezident Jo Baydenning sharafiga Jo deb nom bergan.
Joning tarixi katta shov-shuvlarga sabab bo‘ldi: u haqda dunyoning yirik OAVlari yozdi, shuningdek, qush haqida Avstraliya bosh vaziri Maykl Makkormak ham fikr bildirdi. Mazkur voqealar fonida Amerika poyga kaptarlari ittifoqi bayonot bilan chiqib, qush panjasidagi bog‘ichni soxta deb atadi.
Melburnda kaptarlarni qutqarish bilan shug‘ullanuvchi tashkilot Jo asli Avstraliyada yashagan bo‘lishi mumkinligini ma’lum qilgan. Ta’kidlanishicha, bunga qadar ham soxta halqalar kiygizilgan kaptarlar topilgan, bu haqda mamlakat Qishloq xo‘jaligi vazirligiga xabar berilgan. Bundan tashqari, Kamberlend poyga kaptarlari markaziy federatsiyasi Jo poyga kaptari ekanligiga shubha bildirgan, chunki u juda yosh ko‘rinadi.
Keyinroq Qishloq xo‘jaligi va suv resurslari vazirligi “Jo Avstraliyada yashaganligi va bioxavfsizlikka xavf tug‘dirmasligini” ma’lum qilgan. Idoraning hisoblashicha, qush panjasidagi bog‘ich soxta.
Avvalroq Belgiyada poyga kaptari rekord narxga sotilgani to‘g‘risida xabar berilgandi.
Izoh (0)