Kongress binosiga hujum uyushtirgan shaxslar “AQSh hukumatining saylangan mansabdorlar shaxslarini qo‘lga olib, o‘ldirmoqchi bo‘lgan”. Bu haqda Arizona okrugi prokurorining QAnon “shomoni” Jeykob Entoni Chenslini hibsda ushlab turish muddatini uzaytirish borasidagi iltimosnomasida so‘z boradi, deb yozadi Meduza.
The Washington Post e’tibor qaratgan iltimosnomada qayd etilishicha, hujum ishtirokchilari maqsadi Chenslining xatti-harakatlari bilan ham tasdiqlanib turibdi. U AQSh vitse-prezidenti, Senat raisi hisoblangan Mayk Pensning stolida “Adolat o‘rnatiladi, bu faqat vaqtga bog‘liq” deya yozuv bitilgan kichkina xat qoldirgan.
Chensli o‘zining xati biror xavf tug‘dirishini rad etgan, biroq ayblov bunga qo‘shilmagan.
Arizonalik 33 yoshli Jeykob Entoni Chensli “QAnon-shomon” nomi bilan tanilgan bo‘lib, u Kapitoliyga uyushtirilgan hujumning asosiy ishtirokchilaridan biriga aylangan. U shoxlari bor paxmoq qalpoqda binoga bostirib kirgan, yuzlari esa Amerika bayrog‘i ranglari bilan bo‘yalgan edi. Hujumdan so‘ng Chensli bezorilik va zo‘ravonlik bilan davlat muassasasiga bostirib kirish ayblovi bilan hibsga olingan edi.
Mavzuga doir: AQSh FQB: Jo Baydenning inauguratsiyasi arafasida norozilik namoyishlari uyushtirilishi mumkin
Huquq-tartibot organlarining shturm vaqtidagi xatti-harakatlari jamoatchilik noroziligiga sabab bo‘ldi, xususan, Kongress quyi palatasi spikeri Nensi Pelosi ham ularni keskin tanqid qildi. Associated Press ma’lumotlariga ko‘ra, tartibsizliklar yuz berishidan bir necha kun avval Kapitoliy politsiyasiga ko‘mak sifatida Milliy gvardiya jangchilari va FQB agentlarini ajratish taklif qilingan, biroq politsiya bu imkoniyatdan foydalanmagan. Tartibsizliklardan so‘ng Kapitoliy politsiyasi rahbari iste’fo berdi.
Izoh (0)