JSSTning Favqulodda holatlar bo‘yicha qo‘mitasi koronavirusga qarshi emlanganlik to‘g‘risidagi hujjatning mavjudligi xorijga safar qilishning majburiy shartiga aylanmasligi lozim deb hisoblaydi. Bu haqda tashkilot saytiga joylashtirilgan bayonotga tayanib, “Interfaks” xabar berdi.
“Vaksinalarning infeksiyaning tarqalish darajasini pasaytirishga qanchalik ta’sir ko‘rsatishi hozircha noma’lum ekanligi, shuningdek, ayni vaqtda vaksinalardan foydalanish imkoniyati juda cheklangani hisobga olinadigan bo‘lsa, qo‘mita dunyo mamlakatlariga kelgan sayyohlardan vaksinatsiyadan o‘tganlik to‘g‘risida dalil so‘ramaslikni maslahat beradi.
Qo‘mita mamlakatlar rahbarlariga “muvofiqlashtirilgan dalillarga asoslangan sayohat xavfsizligi choralarini ko‘rishni hamda JSST bilan ilg‘or amaliyotlar va tajriba almashishni” tavsiya qiladi.
Shu bilan birga, JSST qo‘mitasining ta’kidlashicha, sayyohlar koronavirusning sayohatlar orqali yuqish xavfini kamaytirish bo‘yicha barcha zaruriy choralarga rioya qilishi kerak.
Avvalroq JSSTning Yevropa mintaqaviy byurosi Jahon sog‘liqni saqlash tashkiloti sayyohlarga vaksinatsiya olganligi to‘g‘risidagi pasport berish masalasini o‘rganib chiqayotganini ma’lum qilgandi.
So‘nggi ma’lumotlarga ko‘ra, dunyo bo‘ylab koronavirus oqibatida vafot etganlar soni 2 million kishidan oshgan.
Izoh (0)