Fransiya prezidenti Emmanuel Makron Turkiya rahbari Rajab Toyyib Erdo‘g‘onga Parij va Anqara o‘rtasidagi munosabatlarni rivojlantirish taklifi bitilgan maktub yo‘lladi. Bu haqda Turkiya tashqi ishlar vaziri Mavlut Chavusho‘g‘luga tayanib “Korrespondent.net” xabar berdi.
“Ikki kun oldin Makrondan ijobiy maktub oldik, uning mazmuni munosabatlarni rivojlantirish va prezidentimiz bilan uchrashish istagidan iborat. U o‘z qo‘li bilan turk tilida salom yo‘llagan: ‘Qadrli Toyyib’”, — deydi Chavusho‘g‘lu.
Turkiya TIV rahbarining ta’kidlashicha, Erdo‘g‘on Makronning maktubiga ijobiy munosabat bildirgan.
“Prezidentimiz ‘mamnuniyat bilan ko‘rishamiz”, dedi. Gap avvalo videokonferensiya va telefon muzokaralari haqida ketmoqda”, — deya qo‘yshimcha qiladi vazir.
Ikki mamlakat o‘rtasidagi keskinlik 2020-yilning kuzida Fransiyada sodir bo‘lgan qator hujumlardan so‘ng yuzaga kelgan. Mahalliy hukumat buni “islom terrorchilari tomonidan uyushtirilgan” deb baholangan.
Eslatib o‘tamiz, Fransiyada tarix fani o‘qituvchisi o‘quvchilarga Charlie Hebdo nashri tomonidan chop etilgan Payg‘ambar Muhammad (s.a.v.)ning karikatura suratini ko‘rsatgan. Shundan so‘ng o‘qituvchi chechenistonlik muhojir tomonidan o‘ldirilgan. Bu voqea Fransiyada keng jamoatchilikning muhokamasiga sabab bo‘ldi. O‘ldirilgan o‘qituvchi bilan vidolashish marosimida Fransiya prezidenti Emmanuel Makron mamlakat so‘z erkinligidan, jumladan, karikatura borasidagi erkinlikdan voz kechmasligini ma’lum qilgan. Fransiya prezidentining mazkur bayonoti ortidan Yaqin Sharqdagi ba’zi mamlakatlarda Fransiyada ishlab chiqarilgan mahsulotlarni boykot qilish boshlandi.
Izoh (0)