“Spartak” sobiq bosh direktori Shamil Gazizov o‘zbekistonlik yarim himoyachi Oston O‘runovning transferidan pul ishlab olishi mumkin.
“Chempionat”ning xabar qilishicha, shartnomaga ko‘ra, O‘runovning transfer qiymati 1 million yevrodan ortadigan bo‘lsa, Gazizov ortiqcha miqdorning 50 foiziga egalik qiladi. Misol uchun, “Spartak” O‘runovni 2 million yevroga sotadigan bo‘lsa, Gazizov 500 ming yevroga ega bo‘ladi.
Avvalroq “Spartak” 20 yoshli futbolchini sotib yuborish niyatida ekani, biroq unga xaridor yo‘qligi haqida xabar qilingandi. Ayrim xabarlarga ko‘ra O‘runov sobiq jamoasi “Ufa”ga qaytishi mumkin.
O‘runov 2020/21-yilgi mavsum “Spartak” safida Rossiya chempionatining 8 ta o‘yinida maydonga tushib, birorta ham samarali harakat amalga oshira olmadi.
O‘runov 2020-yilning yanvarida “Ufa” futbolchisiga aylangandi va 2019/20-yilgi mavsumda Rossiya Premyer Ligasida 10 o‘yinda maydonga tushib, 2 ta sariq kartochka oldi. Oston yozgi transfer oynasida “Ufa”dan 1 million yevro evaziga poytaxt klubiga o‘tdi.
Eslatib o‘tamiz, “Ufa” va “Spartak” klublari sobiq direktori Shamil Gazizov Ostonning har ikki transferini amalga oshirishda bosh bo‘lgan.
Mavzuga doir:
- “Spartak” Shamil Gazizovni ishdan bo‘shatdi. Aynan u Oston O‘runovni Moskva klubiga olib kelgandi
- Oston O‘runov: “Birgina surat bu qadar muhokamalarga sabab bo‘ladi deb o‘ylamagandim”
- “Ufa” Oston O‘runovni ijaraga olish borasida taklif bilan chiqdi. “Spartak” futbolchini sotishni istamoqda
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)